Ağırlıqqaldıranlar, növbə sizindir!
Paris Yay Olimpiya Oyunlarına lisenziya xarakterli son yarışlar bir-birini əvəz etdikcə rəqabət daha da gərginləşir. Bəzi idman növlərində vəsiqə lisenziya xalı ilə müəyyən olunduğuna görə yarışlar tam başa çatdıqdan sonra kimlərin Parisə gedəcəklərinə aydınlıq gələcək.
Bu gün Bolqarıstanın paytaxtı Sofiyada start götürən ağırlıqqaldırma üzrə Avropa çempionatında qitənin ən iddialı atletləri daha bir şansdan istifadə edəcəklər.
43 ölkədən 400-dən çox idmançının qatıldığı lisenziya xarakterli yarışda Azərbaycan komandasının üzvləri Nazilə İsmayılova (45 kq), İsa Rüstəmov, Tehran Məmmədov (hər ikisi 67 kq), Ömər Cavadov (73 kq), Ravin Alməmmədov, Füqan Əliyev (hər ikisi 81 kq), Nurlan Məmmədzadə (89 kq), Əli Şükürlü (102 kq), Dadaş Dadaşbəyli (109 kq) də güclərini sınayacaqlar. Yığmamız hazırlıq çərçivəsində Türkiyədə yerli komanda, Bakıda isə Özbəkistan yığması ilə təlim-məşqlər keçib.
Kişilərdən ibarət yığmamızın baş məşqçisi Maxtı Makkayev “XQ”yə açıqlamasında komandamızın əsas hədəfinin lisenziya qazanmaq olduğunu bildirdi. O qeyd etdi ki, yığma üzvlərindən İsa Rüstəmov, Ömər Cavadov və Dadaş Dadaşbəyliyə daha çox ümid bəsləyir. Onlardan başqa, Əli Şükürlü, Ravin Alməmmədov, Nurlan Məmmədzadə də güclü potensiala malikdirlər. Qitə çempionatından sonra – aprel ayında idmançılarımız daha bir lisenziya xarakterli yarış olan dünya kuboku turnirində mübarizə aparacaqlar.
Qeyd edək ki, təmsilçimiz Dadaş Dadaşbəylinin adı 2023-cü ilin ən yaxşı kişi ağırlıqqaldıranlarının siyahısına daxil edilib. “Avropanın qızıl 10-luğu” adlı siyahı Beynəlxalq İdman Jurnalistləri Assosiasiyasının (AİPS) Avropa bölümü (AİPS Europe) və Avropa Ağırlıqqaldırma Federasiyası (EWF) arasında imzalanan memorandum çərçivəsində hazırlanıb. Bu idmançılar arasından səsvermə yolu ilə ilin ən yaxşı atleti seçiləcək. Qalibin adı bu gün – fevralın 12-də, Bolqarıstanın paytaxtı Sofiyada keçiriləcək Avropa çempionatının rəsmi açılış mərasimində açıqlanacaq.
Ötən il dünya çempionatının bürünc medalını qazanan D.Dadaşbəyli Avropa çempionatına da qələbə üçün yollanıb:
–Gücümüzdən maksimum istifadə etmək üçün bütün səylərimizi toplamalıyıq. Əsas hədəf lisenziya qazanmaqdır. Hər birimiz qələbə üçün çıxış edəcəyik.
Komandanın üzvü Füqan Əliyev Türkiyədə yaxşı təlim-məşq toplanışı keçdiklərini dedi:
–Avropa çempionatına hazırlığımız yaxşı oldu, istədiyimiz çalışmaları etdik. Özüm barədə deyə bilərəm ki, Vətənə medallarla dönmək istəyirəm. Bütün komanda üzvlərimiz də buna kökləniblər, bunun üçün çalışırlar. Rəqiblərimizi də tanıyırıq, yarışlarda onlarla iştirak edib mübarizə aparmışıq. İnanırıq ki, yaxşı nəticələr əldə edəcəyik.
Qadın ağırlıqqaldıranımız Nazilə İsmayılova da özünə əmindir:
–Komandamız yarışa hazırdır, mən də həmçinin. Özümə qarşı tələbkaram, sona qədər mübarizə aparacağam. İnanıram ki, Vətənə medalla qayıdacağam.
Avropa çempionatı fevralın 20-dək davam edəcək.
Leyla QURBANOVA
XQ
.jpg)