Futbol öz rekordları ilə təkcə azarkeşləri deyil, bütün dünyanı heyrətə salmaqdadır. Dövri mətbuat “Transfermarket”ə istinadən xəbər verir ki, 2023-cü ilin yay transfer pəncərəsi məcmu klub xərclərinə görə futbol tarixində xərclər rekordunu yeniləyib.
Avqustun 30-na olan məlumata görə, klubların ümumi xərcləri 7,631 milyard avro təşkil edib. Bundan əvvəlki transfer xərcləri rekordu 2019-cu ilin yay transfer pəncərəsində yenilənmişdi və o zaman futbol klubları möcüzəli oyunun cazibədarlığına xidmət məqsədilə 7,568 milyard avro xərcə düşmüşdülər.
BBC-yə istinadən verilən məlumatda bildirilir ki, bu yay transfer pəncərəsində ən çox pul xərcləyən İngiltərə Premyer Liqasının klubları olub. Dünyanın ən populyar futbol liqası sayılan bu liqa nümayəndələri yeni futbolçuların alınmasına 2,75 milyard avro xərcləyib. Onların bundan əvvəlki dünya rekordu ötən ilin yayında qeydə alınıb və həmin mövsümdə, İngiltərə klubları transferlərə 2,24 milyard avro ayırıblar.
Yeni rekordun qeydə alınmasında ikinci yerdə Səudiyyə Ərəbistanının klubları qərarlaşıb. Onlar builki transfer pəncərəsində futbolçuların satın alınmasına 846 milyon avro xərcləyiblər. Siyahıda üçüncü yeri İtaliya A seriyasının futbol klubları tutur.
Leyla HADİ,
tələbə-jurnalist