“Qarabağ”la Cəbəllütariq klubu “Linkoln” arasında keçirilən UEFA Çempionlar Liqasının I təsnifat mərhələsinin cavab oyununda Ağdam təmsilçisi rəqibi üzərində inamlı qələbə qazanıb.
Qurban Qurbanovun kollektivi Bakı Olimpiya Stadionunda keçirilən görüşdə Cəbəllütariq çempionu “Linkoln”un qapısından 4 cavabsız qol keçirib. Albaniyalı hakim Eldorjan Hamitinin idarə etdiyi oyunda qolları Abdullah Zubir, Bəhlul Mustafazadə, Redon Cica və Marko Yankoviç vurublar.
Qeyd edək ki, bu komandalar arasında Cəbəllütariqdə keçirilən ilk oyunda “Qarabağ” 2:1 hesablı qələbə qazanmışdı.
Bununla da, II təsnifat mərhələsinə yüksələn “Qarabağ” burada Polşa çempionu “Rakuv”a rəqib olub. İlk oyun iyulun 26-da Polşada olacaq.
L.QURBANOVA, “Xalq qəzeti”