Bakıda Avropa Oyunları Parkında çimərlik futbolu üzrə dünya çempionatının Avropa üzrə seçmə mərhələsi çərçivəsində mətbuat konfransı keçirilib. 

Tədbirdə çıxış edən Gənclər və İdman Nazirliyinin Olimpiya və Para­limpiya idman növləri sektorunun mü­diri Fikrət Hüseynov Bakıda keçiriləcək çimərlik futbolu üzrə dünya çempiona­tının seçmə mərhələsi ilə bağlı məlu­mat verdi. Qeyd etdi ki, turnirə qatılan komandalardan 4-ü final mərhələsində mübarizə aparacaq. Bu idman növü­nün ölkəmizdə inkişaf etdiyini bildirən F.Hüseynov komandamızın III Avropa Oyunlarında beşinci yeri tutmasının yaxşı nəticə olduğunu bildirdi: “Milli komandamızın dünya çempionatına vəsiqə qazanacağına inanıram. İdman­çılarımıza uğurlar arzulayıram”.

Dünya Çimərlik Futbolu Təşkilatının (BSWW) vitse-prezidenti Qabino Re­nales Azərbaycanda olmaqdan məm­nunluq hissi duyduğunu və əvvəllər də paytaxt Bakıda olduğunu xatırlatdı. Azərbaycanda çimərlik futbolunun inki­şaf etdiyini vurğulayan qurum rəsmisi yığma komandamızın Avropa Oyunla­rında nəticəsini xüsusi vurğuladı: “Bu idman növünün inkişaf etdiyi Avropada beşinci yer yaxşı nəticədir. Çünki Avro­pada çox güclü komandalar var”. 

Qabino Renales Azərbaycanda idman tədbirlərinin təşkili üçün ge­niş imkanların olduğunu da vurğuladı: “Seçmə mərhələnin keçirildiyi arena möhtəşəmdir. Növbəti dünya çempio­natına Birləşmiş Ərəb Əmirlikləri ev­sahibliyi edəcək. Gələcəkdə belə bir təşəbbüs olarsa, yenidən Bakıda turnir­lərimizi təşkil edə bilərik”.

Paytaxtımızın həmişə beynəlxalq idman tədbirlərinə yüksək səviyyədə evsahibliyi etdiyini vurğulayan Azər­baycan Çimərlik Futbolu Federasiya­sının prezidenti Fərid Novruzi dünya çempionatının seçmə mərhələsinin Bakıda təşkilinin bizim üçün əhəmiy­yətli olduğunu dedi: “Seçmə mərhələ­də yığmamızdan uğurlu çıxış gözləiyi­rik. Ölkəmizdə 2008-ci ildən çimərlik futbolu inkişaf etdirilir. Ötən müddət ərzində böyük işlər görülüb. Millimiz Avropa arenasında inkişaf etmiş bu idman növü üzrə reytinq cədvəlində onuncu yeri tutur”. 

III Avropa Oyunlarının komandamız üçün bir növ hazırlıq olduğunu bildirən federasiya rəhbəri əsas məqsədin ko­mandamızın dünya çempionatının final mərhələsinə vəsiqə qazanmaq olduğu­nu dedi. 

Çimərlik futbolu üzrə Azərbaycan milli komandasının baş məşqçisi Zey­nal Zeynalov dünya çempionatının seç­mə mərhələsinin Bakıda təşkil olunma­sının sevindirici hal olduğunu vurğuladı. Qeyd edək ki, yığmamızın potensialı var. İnanıram ki, millimiz imkanlarından maksimum istifadə edəcək.

Dünya çempionatının seçmə mər­hələsində bu gün Azərbaycan yığması ilk oynunun Moldova seçməsinə qarşı keçirəcək. İyulun 5–7-də keçiriləcək seçmə mərhələsində reytinqə görə ən yaxşı 13 komanda mübarizə aparacaq. İyulun 8-də yarımfinal və pley-off oyun­ları, 9-da isə bu mərhələnin qalibini tə­yin edəcək final matçı olacaq.

L.AZAD, “Xalq qəzeti”