Azərbaycan Tibb Universiteti (ATU) tələbələrinin məzun günündə tanınmış ictimai-siyasi xadimlər, səhiyyə işçiləri və digər qonaqlar iştirak ediblər. Dövlət himni səsləndirildikdən sonra səhiyyə naziri Teymur Musayev bu günün gələcəyin həkimlərinin yaddaşında gözəl bir tarix kimi qalacağını bildirib.

Nazir vurğulayıb ki, hər bir dövlətin inkişaf yolunda və uğurlarının arxasında xalqına, Vətəninə sıx bağlılığı olan tarixi şəxsiyyətlər dayanır: “Bu il Azərbaycan səhiyyəsinin və tibb elminin inkişafında xüsusi yer tutan iki böyük şəxsiyyətin – müasir Azərbaycanın memarı və quru­cusu, ümummilli lider Heydər Əliyevin və görkəmli oftalmoloq-alim, akademik Zə­rifə xanım Əliyevanın 100 illik yubileyləri ilə əlamətdardır. Müstəqil dövlətimizdə hər sahədə olduğu kimi, səhiyyənin və tibb təhsilinin də inkişafı ulu öndər Hey­dər Əliyevin adı ilə bağlıdır. Ulu öndər səhiyyənin tərəqqisi, maddi-texniki ba­zasının gücləndirilməsi, yeni tibb müəs­sisələrinin açılması üçün zəruri addımlar atıb. Təbabət elminə və tibb təhsilinə bö­yük töhfələr vermiş oftalmoloq-alim, aka­demik Zərifə xanımın tələbələri, əsərləri ilə formalaşan mütəxəssislər nəsli bugün yeni həkim kadrların və alimlərin hazırlığı sahəsində əzmlə çalışırlar. 

Bu gün Prezident İlham Əliyevin uzaqgörən siyasəti, bacarıqlı rəhbərliyi və gərgin zəhməti sayəsində Azərbaycan hər sahədə inkişaf edir. Dövlət başçısının rəhbərliyi altında əhalinin sağlamlığının qorunması sahəsində də böyük nailiyyət­lər əldə olunur, səhiyyənin tərəqqisi daim diqqət mərkəzində saxlanılır. Tibb müəs­sisələrinin maddi-texniki bazası güclən­dirilir, səhiyyənin maliyyələşdirilməsində köklü islahatlar aparılır, rəqəmsallaşma təminatlı tibbi xidmət istiqamətində işlər görülür. 

Birinci vitse-prezident, ixtisasca hə­kim Mehriban xanım Əliyeva da səhiyyə sahəsində çalışanlara həmişə diqqət və qayğı göstərir, tibb işçilərinin əməyini və fədakarlığını yüksək qiymətləndirir". 

T.Musayev məzunları təbrik edərək deyib ki, Azərbaycanın ilk ali məktəblə­rindən biri olan Tibb Universiteti onilliklər boyu səhiyyə ocaqları üçün yüksək ixti­saslı həkim kadrları yetişdirib. Hazırda bu qocaman tibb təhsil ocağı yeni təhsil standartlarına əsaslanaraq, müasir infor­masiya texnologiyalarından istifadə edir və beynəlxalq akkreditasiyadan keçmiş tədris proqramları ilə yüksək ixtisaslı mütəxəssislər hazırlayır. Onun hər bu­raxılışı səhiyyəmiz və təbabətimiz üçün əlamətdar hadisədir. 

Universitetin rektoru, professor Gə­ray Gəraybəyli gələcəyin həkimlərinə karyeralarında uğurlar diləyərək ATU-nun məzunu adını hər yerdə uca tutmağı arzulayıb. Rektor ATU-nun fəaliyyəti, son illər tədris prosesində aparılan islahatlar, tətbiq edilən yeniliklər, yüksək ixtisaslı kadrların hazırlanması üçün görülən işlər barədə də məlumat verib.

Qeyd olunub ki, 2022–2023-cü tədris ilində Azərbaycan Tibb Universitetinin 1217 nəfər məzunu olub. Onlardan 152 nəfəri fərqlənmə diplomuna layiq görü­lüb. Məzunlar arasında 389 nəfəri əcnə­bilərdir. Müvafiq olaraq I müalicə-profilak­tika fakültəsini 393, II müalicə-profilaktika fakültəsini 371, ictimai səhiyyə fakültəsini tibbi profilaktika ixtisası üzrə 69, stoma­tologiya fakültəsini 224, əczaçılıq fakültə­sini 115, hərbi fakültəni 45 tələbə bitirib.

Məzunlar xalqımızın sağlamlığının keşiyində ləyaqətlə duracaqlarına söz verib və Hippokrat andı içiblər.

Təhsilini əla qiymətlərlə başa vuran məzunlara və universitetin ictimai həya­tında fəal iştirak edən gənclərə fəxri fər­manlar təqdim olunub. Diplomları səhiy­yə naziri Teymur Musayev və ATU-nun rektoru Gəray Gəraybəyli təqdim ediblər.

Tədbir tanınmış sənət ustalarının çıxışı ilə davam edib. ATU-nun tələbələri sənətçilərlə eyni səhnəni bölüşüb, hərbi fakültənin tələbələri vətənpərvərlik ru­hunda mahnılar ifa ediblər.

Z.BƏŞİRQIZI, “Xalq qəzeti”