Azərbaycan Xüsusi Olimpiya Komitəsinin komandası ciddi sınaq qarşısındadır. Sağlamlıq imkanları məhdud idmançılarımız iyunun 18-də Almaniyanın Berlin şəhərində start götürəcək dördilliyin nüfuzlu yarışlarından biri Dünya Xüsusi Yay Olimpiya Oyunlarında mübarizə aparacaqlar. Uzun aylar, illər yorulmadan çalışaraq idman bacarıqlarını artıran, hədəfə çatmaq üçün bütün maneələri aşmağa nail olan təmsilçilərimiz bu dəfə də sübut etməyə çalışacaqlar ki, idman heç bir əngəl tanımır. 

Onlar “Berlin-2023”də istər Qış, istər­sə də Xüsusi Yay Olimpiya Oyunlarında qazandıqları böyük uğurların davamını gətirməyə çalışacaqlar. Berlinin Olimpiya stadionunda keçiriləcək mötəbər yarışda komandamız idmanın 10 növü üzrə 72 nəfərdən ibarət heyətlə təmsil olunacaq. Bədii gimnastımızın isə ilk dəfə Olimpia­dada təmsil olunacağını xüsusi vurğula­malıyıq.

Xüsusi Olimpiya Komitəsinin sədri Şahin Əliyev “Xalq qə­zeti”nə açıqlamasında atletlərimizin yarı­şa yaxşı hazırlaşdıqlarını bildirdi: “Xüsusi olimpiyaçılarımız atletika, badminton, basketbol (qızlar), cüdo, bədii gimnasti­ka, həndbol (qızlar), pauerliftinq, stolüstü tennis, üzgüçülük və voleybol (oğlanlar) idman növlərində mübarizə aparacaqlar. Oyunların açılış mərasimi iyunun 17-də, bağlanışı isə 25-də olacaq. 

Qarşıda duran əsas məqsədimiz ko­mandamızın uğurlu çıxışını təmin etmək­dir. Bununla bağlı bütün tədbirlər görü­lüb. İdmançılarımız yaxşı formadadırlar. Ümid edirik ki, nəticələr də yaxşı olacaq”. Bundan əvvəl Dünya Xüsusi Olimpiya Oyunları Birləşmiş Ərəb Əmirliklərinin paytaxtı Əbu-Dabidə keçirilib. Həmin ya­rışda 54 idmançı ilə təmsil olunan Azər­baycan yığması atletika, pauerliftinq, cüdo, stolüstü tennis, badminton, futbol, həndbol, basketbol, voleybol və üzgüçü­lük idman növlərində mübarizə aparıb. Yüksək potensial və böyük əzmkarlıq nümayiş etdirən idmançılarımız 6-sı qızıl, 10-u gümüş, 8-i bürünc olmaqla 24 me­dal qazanıblar.

Qeyd edək ki, Beynəlxalq aləmdə “Special Olympics” (Speşial Olimpiks) adı ilə tanınan Xüsusi Olimpiya hərəka­tının əsasını 1963-cü ildə ABŞ Prezidenti Con Kennedinin bacısı Yunis Kenne­di-Şrayver qoyub. Hər şey əqli imkanları məhdud olanlar üçün onun evində id­man-sağlamlıq düşərgəsinin təşkilindən başlayıb. Onların futbol oynamaqda, qaçmaqda və üzgüçülükdə göstərdikləri məharət və fəallıq tezliklə bütün dünya­nın diqqətini cəlb edib və bütün bunlar əqli imkanları məhdud olanlara qarşı ic­timai fikrin tam dəyişməsinə səbəb olub. 

1968-ci ildə Çikaqoda ilk Dünya Xü­susi Yay Olimpiya Oyunları keçirilib. Xü­susi Olimpiya Komitəsinin Baş Qərargahı ABŞ-ın paytaxtı Vaşinqton şəhərindədir. Azərbaycan Xüsusi Olimpiya hərəkatına 1990-cı ildən etibarən qoşulub. Komitə 1993-cü ildən etibarən Beynəlxalq Xüsu­si Olimpiya və Avropa/Avrasiya Komitəsi­nin üzvüdür. 

Xüsusi Olimpiya hərəkatında əsas məqsəd xüsusi olimpiyaçıların məhz bö­yük idmanla deyil, kütləvi idmanla məş­ğul olmasını təmin etməkdir. Təsadüfi deyil ki, xüsusi Olimpiya hərəkatının de­vizi “Mənə imkan verin, mübarizə aparıb qalib gəlim. Qalib gələ bilməsəm də hər yarışdan sonra cəsarətli olum”, – fikridir. Bu şüar belə insanların nə qədər həssas münasibətə ehtiyac duyduqlarını və qa­libiyyət uğrunda mübarizə aparmalarının əsl qəhrəmanlıq olduğunu aydın göstərir. 

Bəli, heç bir maneə tanımadan böyük əzmkarlıqla mübarizə apararaq qələbə qazanmaq üçün fədakarlıq göstərən id­mançıların hər biri qalibdir! Qələbə so­raqlı idmançılarımızdan uğurlar gözləyi­rik!

Leyla QURBANOVA, “Xalq qəzeti”