Dünyanın idman mərkəzlərindən birinə çevrilmiş Azərbaycanda daha bir mötəbər turnir uğurla keçirildi. Bu dəfə mahir nişançılar Avropada ən böyük atıcılıq komplekslərindən biri olan Bakı Atıcılıq Mərkəzində bir araya gəldilər. Ölkəmizdə artıq üçüncü dəfədir keçirilən dünya kuboku yarışında 66 ölkədən 600-dən çox idmançı mübarizə apardı. Onu da qeyd edək ki, mötəbər yarış ümummilli lider Heydər Əliyevin 100 illik yubileyinə həsr olunmuşdu. Xatırlatmaq yerinə düşər ki, müxtəlif ölkələrdən ən güclü idmançılar ötən həftə xalqımızın ulu öndəri Heydər Əliyevin 100 illik yubileyinə həsr edilmiş Avropa tennis turniri, “Prezident kuboku-2023” beynəlxalq reqatası, “Baku Open-2023” beynəlxalq şahmat festivalı, həmçinin cüdoçuların yarışdığı Göygöl Avropa kubokunda iştirak ediblər. 

Təqdirəlayiq haldır ki, bu ya­rışların ünvanı təkcə paytaxt Bakı deyil, həm də, ölkəmizin ayrı-ayrı regionları, rayonlarıdır. Bununla da, ölkəmizin idman siyasətində priori­tet istiqamətlərdən biri olan bədən tərbiyəsi və idmanın kütləviliynə nail olmaq üçün onun daha geniş coğrafi məkanda inkişaf etdirilməsi uğurla həyata keçirilir. Bu nüfuzlu idman tədbirlərinin digər regionlarla yanaşı, artıq işğaldan azad olun­muş torpaqlarımızda da keçirilməsi ölkəmizin bütün sahələrdə olduğu kimi, idmanda da artan gücünü, bö­yük nüfuzunu göstərir. 

“Prezident kuboku-2023” bey­nəlxalq reqatasının 100 illlik yu­bileyini qeyd etdiyimiz ümummilli lider Heydər Əliyevin təşəbbüsü ilə 1976-cı ildə inşa edilən Suqovuşan su anbarında start götürməsi özlü­yündə rəmzi məna daşıyırdı. Bu gün düşmən işğalından azad olunmuş şəhər, qəsəbə və rayonlarda bu cür genişmiqyaslı beynəlxalq tədbirlərin təşkili bir daha göstərir ki, Qaraba­ğa həyat qayıdır. Vəhşi düşmənin 30 il ərzində daşı daş üstündə qoy­madığı doğma torpaqlarımızın dir­çəlməsi dünyanın gözü önündə baş verir. Belə bir beynəlxalq turnirin təşkil edilməsi işğaldan azad edilən torpaqlara, həm də sülhün və sabit­liyin qayıdışının gözəl nümunəsidir. 

Azərbaycanda keçirilən hər hansı bir mötəbər idman tədbirinin iştirakçıları ölkəmizin tarixi nailiyyəti olan sülhün, sabitliyin, təhlükəsizli­yin qorunmasını ilk növbədə vurğu­layırlar. Təbii ki, bunu bütün ölkələr barədə demək olmaz. Buyaxınlarda Ermənistanda Avropa çempiona­tının açılış mərasimində ölkəmizin bayrağının vəhşicəsinə yandırıl­ması dünyanın diqqət mərkəzinə gələrək qəti pislənildi. Düşmən ölkədə sülhün, həmrəyliyin bərqərar olmaması səbəbindən böyük tədbir­lərin təşkili zamanı xarici qonaqların təhlükəsizliyi sual altına düşür. Ay­rı-ayrı federasiyaların ən nüfuzlu idman yarışının ev sahibliyini Azər­baycana etibar etməsinin əsasında da bu faktorlar durur: İdmançıların öz potensiallarını üzə çıxarması üçün qurulan mükəmməl infrastruk­tur, yüksək səviyyəli təşkilatçılıq və ölkəmizdə sabitlik və təhlükəsizliyin hökm sürməsi. Elə ölkəmizdə keçi­rilən nüfuzlu tədbirlərin iştirakçıları da mətbuata verdikləri müsahi­bələrdə bu mühüm amilləri xüsusi vurğulayırlar. 

Dünya kubokunda 10 metr mə­safəyə pnevmatik tüfəngdən atəş açma üzrə yarışda qızıl medal qa­zanan Çin atleti Han Jiayun müa­sir üslublu Bakı Atıcılıq Mərkəzində­ki meydançalarda yarışmağın ona xüsusilə zövq verdiyini qeyd edib. Yarışın yüksək təşkilatçılığını vur­ğulayan idmançı sabitlik adası olan Azərbaycanı çox bəyəndiyini, yerli sakinlərin xarici qonaqlara isti mü­nasibətini xüsusi qeyd edib. 

Kişilər arasında 25 metr mə­safəyə tapançadan cəld atəş üzrə yarışın final mərhələsində gümüş medal qazanan fransalı Klemen Besua isə Azərbaycanda dəfələr­lə yarışlarda iştirak etdiyini bildirib. Ölkəmizdə yarışların təşkilatçılıq səviyyəsini qeyd edən atlet bura­da heç zaman hər hansı problemlə qarşılaşmadığını da deyib. Ən son tələblərə cavab verən Bakı Atıcılıq Mərkəzini isə dünyada ən yaxşılar­dan biri olduğunu söyləyib. 

İngiltərə tarixinin ən uğurlu atıcı qadını 50 metr məsafəyə tüfəng­dən 3 mövqedən atəş üzrə yarı­şın final mərhələsində qızıl medal qazanan Böyük Britaniya atleti Şona Makintoş artıq 4-cü dəfədir Azərbaycanda olur. Deyir ki, Bakı bəyəndiyi ən gözəl şəhərlərdən biri, Bakı Atıcılıq Mərkəzindəki atəş meydanları isə dünyada ən yaxşı­lardandır. Havanın küləkli olması belə qızıl medal qazanmağa mane ola bilməyib. Atlet bunun özünün də bir əyləncə olduğunu bildirib. 

Qarşıda ölkəmizi daha böyük id­man tədbirləri gözləyir. Mayın 17-də Milli Gimnastika Arenasında bədii gimnastika üzrə Avropa çempio­natı başlayacaq. Bu ayın sonunda isə taekvondo üzrə dünya çempi­onatı Bakıda təşkil ediləcək. Yarış Ümumdünya Taekvondo Federa­siyasının 50 illiyinə təsadüf edə­cəyindən yubiley ölkəmizdə qeyd olunacaq. Bu səbəbdən də mundial əvvəlkilərdən fərqlənəcək və pay­taxtımıza 3 minədək qonağın gəlişi gözlənilir. 

Avqustda isə atıcılıq üzrə dünya çempionatında iştirak etmək üçün planetin ən güclü idmançıları ölkə­mizə gələcəklər. Paris Olimpiadası­na ən çox lisenziya məhz Bakıdakı yarışda öz sahibini tapacaq. 

Beləliklə, müxtəlif növlər üzrə dünyanın ən güclü idmançıları Azərbaycana böyük arzularla gəlir­lər. Ölkəmizdə keçirilən hər bir nü­fuzlu yarış idmanın zirvəsinə apa­ran böyük uğurun qarantına çevrilir. 

Leyla QURBANOVA, “Xalq qəzeti”