Serbiyanın Vrnyaçka Banya şəhərində 500-dək şahmatçının iştirakı ilə keçirilən şəxsi Avropa çempionatı başa çatıb. “Chess-results.com” saytının məlumatına görə, FİDE bayrağı altında çıxış edən rusiyalı şahmatçı Aleksey Sarana çempionatın qalibi olub.
Bildirilir ki, 11 tur ərzində mümkün on bir xaldan 8,5-ni toplayan Aleksey Sarana əlavə göstəricilərə görə eyni xalı toplamış daha iki şahmatçını qabaqlamağı bacarıb. Onun əlavə göstəricilərə görə üstələdiyi şahmatçılar Belçikanı təmsil edən Kiril Şevçenko və Daniel Darda olublar. K.Şevçenko çempionatın gümüş, Daniel Darda isə bürünc mükafatına layiq görülüblər.
On birinci turda Azərbaycan şahmatçısı Nicat Abasov Monteneqro təmsilçisi Luka Droskoviç üzərində qələbəyə sevinib. Bununla da o, hesabındakı xalların sayını 7,5-ə çatdırıb. Yekun nəticədə çempionatı 7-ci yerdə başa vuran qrossmeysterimiz ilk 23-lüyə düşməyi bacarıb. Bununla da N.Abasov yayda Bakıda keçiriləcək Dünya kubokuna vəsiqəni təmin edib. Beynəlxalq idman ustamız Nail Bəşirli isə serbiyalı şahmatçı Boris Stankoviç üzərində qələbə qazanıb. Bəşirli yarışı 5,5 xalla başa vurub. Macar şahmatçı Devid Didsaymonsu məğlubiyyətə uğradan Şahin Vəliyev də eyni nəticəni göstərib.
Həmyerlimiz Əhməd Xaqan da son turda qələbəyə sevinənlərdən olub. Belə ki, o, ispaniyalı Adrian Suaresə qalib gəlib. Ə.Xaqan üçün çempionat 5,5 xalla başa çatıb. FİDE ustası Elmar Atakişiyev də on birinci turda yunanıstanlı rəqibi Dmitri Aleksakis üzərində qələbəni təmin edib. Qadın şahmatçımız Ülviyyə Fətəliyeva isə türkiyəli Tarik Selbesə qalib gəlib. Onun aktivində 5,5 xalı olub.
Təmsilçilərimizdən Ülvi Sadıqov (6 xal) türkiyəli FİDE ustası Eren Atabərkə məğlub olub. Misrətdin İsgəndərov (6,5 xal) də eyni aqibəti yaşayıb. Eltac Səfərli (6,5 xal) isə almaniyalı FİDE ustası Marius Froma uduzub.
Son turda Namiq Quliyev (6,5 xal) də Almaniya təmsilçisi Dmitri Kollarsla bacarmayıb. Qrossmeysterimiz Abdulla Qədimbəylinin (6,5 xal) də bəxti gətirməyib. Vüqar Manafov (6,5 xal) avstriyalı Feliks Bergerə, Əhməd Əhmədzadə (6,5 xal) isə rumıniyalı Filip Lusiyana məğlub olublar. Şahmatçımız Xəzər Babazadə isə Ermənistan təmsilçisi Armen Barseqyanla heç-heçə edib.
Qeyd edək ki, qardaş ölkə Türkiyədən isə ilk 23-lüyə Ediz Gürel düşməyi bacarıb. Ediz Gürel mümkün on bir xaldan 8-ni toplayaraq çempionatı on dördüncü pillədə başa vurub.
Elçin ABBASOV, “Xalq qəzeti”