Azərbaycan Gimnastika Federasiyasının məlumatına görə, bu il aprelin 21-dən 23-dək paytaxtımız gimnastika üzrə daha bir mötəbər yarışa ev sahibliyi edəcək. Belə ki, bu dəfə dünyanın ən güclü bədii gimnastları ölkəmizdə təşkil olunacaq Dünya kubokunda bir araya gələcəklər.
Azərbaycanın bu il ev sahibliyi edəcəyi 3-cü beynəlxalq yarışda qeydiyyat siyahısına əsasən, 46 ölkədən idmançıların fərdi və qrup hərəkətləri proqramında mübarizə aparacağı gözlənilir.
3 gün ərzində baş tutacaq yarışda gimnastlar ayrı-ayrı alətlər və çoxnövçülük üzrə mübarizə aparacaqlar.
Ənənəyə uyğun olaraq, bu kubokda da ən çox icra xalını toplamış gimnast və qrup komandasına “AGF Trophy” Kuboku təqdim olunacaq.
Qeyd edək ki, bu, ölkəmizdə bədii gimnastika üzrə təşkil olunacaq 10-cu Dünya kuboku olacaq. Xatırladaq ki, paytaxtımız 2005 və 2019-cu illərdə bu növ üzrə dünya çempionatına və 9 Dünya kubokuna ev sahibliyi edib.
Qeyd edilir ki, Milli Gimnastika Arenasında keçiriləcək yarışlar hər gün saat 12:00-da başlayacaq.
Elçin AĞAMİRZƏ, “Xalq qəzeti”
