Birləşmiş Ərəb Əmirliklərinin Fujeira şəhərində Karate 1 “Youth League” turniri start götürüb.
Dünya Karate Federasiyasının nüfuzlu turnirlərindən olan yarışda 14 yaşadək uşaqlar, 14-15 yaşlı yeniyetmələr, 16-18 və 21 yaşadək gənclər mübarizə aparacaqlar. Azərbaycan Milli Karate Federasiyasının məlumatına görə, 67 ölkədən 1169 idmançının iştirak etdiyi turnirdə ölkəmizi klub və milli komandamızın üzvlərindən ibarət 27 nəfərlik heyət təmsil edəcək. Karateçilərimizi milli komandanın məşqçilərindən Şahin Xudaverdiyev, Seymur Xudaverdiyev və Akif Kərimov müşayiət edəcək.
Beynəlxalq hakimlər Cahangir Babayev, Vüqar Kərimov və Anar Allahverdiyev mötəbər yarışın hakimləri arasında olacaq.
Qeyd edək ki, turnir fevralın 26-da başa çatacaq.
Elçin AĞAMİRZƏ,
“Xalq qəzeti”
