Bolqarıstanın paytaxtı Sofiyada kişi və qadın boksçular arasında keçirilən “Strandja” beynəlxalq turniri davam edir. A kateqoriyalı yarışın üçüncü günündə Azərbaycan millisinin 3 üzvü rinqə çıxıb.
Azərbaycan Boks Federasiyasının məlumatına görə, səkkizdəbir final mərhələsi çərçivəsində Malik Həsənov (63,5 kq) hindistanlı Şiva Tapa ilə döyüşməli olsa da, rəqib görüşə çıxmayıb. Boksçumuz növbəti mərhələdə Mujibillo Tursunovla (Özbəkistan) üz-üzə gələcək.
Məhəmməd Abdullayev də rinqdən qalib ayrılıb. +92 kq çəki dərəcəsində mübarizə aparan dünya çempionatının mükafatçısı Yordan Morehonla (Bolqarıstan) qarşılaşıb və rəqibini 3:2 hesabı ilə məğlub edib. O, dörddəbir finalda Narenderlə (Hindistan) döyüşəcək.
Millimizin digər üzvü Zeynəb Rəhimova (54 kq) Yuliya Korolini (Moldova) sınağa çəkib. Görüş təmsilçimizin qələbəsi ilə yekunlaşıb – 3:1. Rəhimova dörddəbir finalda argentinalı Mixaela Roblesi sınağa çəkəcək.
Qeyd edək ki, 40-dək ölkədən 398 boksçunun (256 kişi, 142 qadın) mübarizə apardığı yarışın qaliblərinin adına fevralın 26-da aydınlıq gələcək.
Elçin AĞAMİRZƏ,
“Xalq qəzeti”