Azərbaycanın “Silk Way West Airlines” aviaşirkəti COP29-un hava nəqliyyatı ilə qlobal yük daşımaları üzrə tərəfdaşı olacaq. Bu isə aviaşirkətin dayanıqlı təcrübə və qlobal iqlim məqsədləri ilə bağlı əzmkarlığını nümayiş etdirir.
COP29 Azərbaycan Əməliyyat Şirkətinin Mətbuat xidmətindən verilən məlumatda bildirilir ki, logistika sahəsində mürəkkəb tapşırıqların həyata keçirilməsi üzrə zəngin təcrübəyə malik və qlobal yük daşımaları sahəsində Xəzər dənizi və Mərkəzi Asiya regionlarının aparıcı avia yükdaşıma şirkətlərindən biri olan “Silk Way West Airlines” COP29-un avia yükdaşımaları üzrə tərəfdaşı təyin edilib.
İri qabaritli və mühüm yüklərin hava nəqliyyatı ilə daşınması sahəsində ixtisaslaşan və 500 min tondan artıq illik yük dövriyyəsinə malik olan bu aviaşirkət Avropa, MDB, Yaxın Şərq, Asiya və Amerika daxil olmaqla 40-dan çox marşrut üzrə kompleks yükdaşıma xidmətlərini təklif edir. Bu tərəfdaşlıq “Silk Way West Airlines” aviaşirkətinin dayanıqlılıq, səmərəlilik və qlobal əməkdaşlıq kimi əsas dəyərlərini sübuta yetirir və onun ekoloji təsirlərini minimuma endirmək əzmini daha da gücləndirir.
Yaradılan bu imkandan istifadə etməklə, COP29-un tərəfdaşları qlobal iqlim siyasəti ilə bağlı fəaliyyətlərini genişləndirəcək, dayanıqlılıq üzrə səylərini ön plana çıxaracaq və öz əsas biznes sahələrində iqlim fəaliyyətinə keçidi dəstəkləyəcəklər. Bakıda keçiriləcək COP29 tədbirinin tərəfdaşı olmaqla bu şirkətlər ekoloji siyasətlərin təkmilləşdirilməsində və 1,5 dərəcə hədəfi baxımından qlobal icmalara dəstək göstərilməsində mühüm və həlledici rol nümayiş etdirəcəklər.
COP29 Azərbaycan Əməliyyat Şirkəti İdarə Heyətinin sədri və əməliyyatlar üzrə baş icraçı Nərmin Carçalova tərəfdaşların elan edilməsi ilə bağlı bunları bildirib: “Biz böyük məmnuniyyətlə bildiririk ki, “Silk Way West Airlines” aviaşirkəti Azərbaycanda keçiriləcək COP29 tədbirinin avia yükdaşımaları üzrə tərəfdaşı təyin edilib. Bu konfrans qlobal iqlim sazişlərinin irəliləməsi, iqlim strategiyalarının reallaşdırılması və “yaşıl” gələcək naminə beynəlxalq əməkdaşlığın artırılması üçün unikal platforma təklif edən transformativ tədbirdir. “Silk Way West Airlines” aviaşirkəti ilə əməkdaşlığımız COP29 çərçivəsində qarşıya qoyulan məqsədlərə nail olmaq baxımından mühüm əhəmiyyət kəsb edir və iqlim sahəsində mühüm nailiyyətlər əldə etmək üçün birgə çalışmaq imkanı qazandırır.
