Norveçin baş naziri Yonas Qar Störe Oksfordda “Avropa Siyasi Birliyi”nin 4-cü Zirvə toplantısında jurnalistlərə dünyadakı icmaların iqlim dəyişikliyinin təsirindən əziyyət çəkdiklərini, havanın temperaturunun 1,5 Selsi dərəcədə saxlanılması ilə bağlı Paris sazişindən irəli gələn öhdəliklərin yerinə yetirilmədiyini vurğulayıb. Eyni zamanda, iqlim dəyişikliyi ilə mübarizədə maliyyəyə böyük ehtiyac duyulduğunu, bu məsələdə dövlət sektoru ilə yanaşı, özəl qurumların da məsuliyyət daşıdığını qeyd edib. 

Baş nazir sözlərinə əlavə edərək bil­dirib ki, beynəlxalq ictimaiyyət iqlim də­yişikliyi ilə mübarizədə vahid mövqedən çıxış etməli, düzgün qərarlar verməlidir. Fəaliyyət daha çox ötən il Şarm əl-Şeyx və Birləşmiş Ərəb Əmirliklərində (BƏƏ) əldə edilmiş qərarlara əsaslanılmalıdır. Buna görə də öhdəliklərin icrası diqqətdə saxlanılmalı, texnologiya və energetika sahəsində görülən işlər ədalətlə qiymət­ləndirilməlidir.

Yonas Qar Störe bu gün bəşəriyyətin hərəkətsizliyə və iqlimə görə fəlakət asta­nasında olduğunu bildirərək əlavə edib ki, planetin xilası geosiyasi parçalanmanın girovuna çevrilməməlidir: “Unutmayaq ki, problemin həlli təkcə iqlimə deyil, iqtisadi rifaha və davamlı inkişafa da kömək et­mək imkanı yaradır. İqlim dəyişikliklərini həll etmək planeti və həssas insanları qo­rumaq deməkdir”.

Qeyd edək ki, BMT-nin İqlim Dəyiş­mələri üzrə Çərçivə Konvensiyasının Tərəflər Konfransının 29-cu sessiyası (COP29) bu ilin noyabrında Azərbay­canda keçiriləcək. Bununla bağlı qərar COP28-in ötən il dekabrın 11- də Du­bayda keçirilmiş plenar iclasında qəbul olunub. İki həftə ərzində Bakı dünyanın mərkəzinə çevriləcək və 70-80 minə yaxın xarici qonağı qəbul edəcək.

BMT İqlim Dəyişikliyi üzrə Çərçi­və Konvensiyası insanın iqlim siste­minə təhlükəli müdaxiləsinin qarşısını almaq məqsədilə 1992-ci ilin iyununda Rio-de-Janeyro şəhərində keçirilmiş Yer Sammitində imzalanmış sazişdir. COP (Conference of Parties) abreviaturunun ingilis dilindən tərcüməsi Tərəflər Konf­ransı deməkdir.

Konvensiyanın tərəfləri 198 ölkədir. Digər tərəflərin fərqli qərarı olmazsa, COP hər il keçirilir. COP-un ilk tədbiri 1995-ci ilin martında Berlində baş tutub, katibliyi Bonn şəhərində yerləşir. 

XQ