Serbiya Prezidenti Aleksandar Vuçiç Baş nazir vəzifəsinə təyinatla bağlı parlamentdə təmsil olunan siyasi partiyalarla məsləhətləşmələrə başlayıb.

AZƏRTAC xəbər verir ki, Aleksandar Vuçiç yeni hökumətə rəhbərlik edəcək namizədin seçilməsi ilə bağlı Prezident sarayında siyasi partiya liderləri ilə görüşlər keçirib.

Serbiya Prezidenti parlamentdəki bütün partiya liderlərinə və parlament qruplarına məktub göndərdiyini, 5 və ya 6 partiyanın məsləhətləşmələrdə iştirak etmək üçün müraciət etdiyini və prosesin aprelin 4-dək yekunlaşacağını bildirib.

Xatırladaq ki, Serbiya Milli Assambleyası martın 19-da Baş nazir Milos Vuçeviç və hökumətin istefasını təsdiqləyib. Yeni hökumətin formalaşdırılması üçün verilən müddət aprelin 18-də başa çatır.

Milos Vuçeviç və bir neçə nazir keçən il noyabrın 1-də Novi Sad şəhərindəki dəmir yolu vağzalında 15 nəfərin öldüyü, 2 nəfərin ağır yaralandığı qəzaya görə tələbələrin keçirdiyi etiraz aksiyalarından sonra istefa vermişdilər.

Nihad Budaqov

AZƏRTAC-ın xüsusi müxbiri

Belqrad