Ermənistanın baş naziri Nikol Paşinyan bildirib ki, bu gün respublikanın Rusiya ilə münasibətləri “həmişəkindən daha praktikdir” və diqqəti konkret məsələlərə yönəlib. Ermənistan hökumətinin başçısı İrəvanın bütövlükdə xarici siyasətini “balanslaşdırılmış və balanslaşdırmaya yönəlmiş” adlandırıb. Xəbəri “Kommersant” verib. 

“Rusiya Federasiyası ilə münasibətlərimiz hər zamankından daha praktikdir, konkret məsələlərə yönəlib. Biz bu münasibətləri qarşılıqlı faydalı əməkdaşlıq və suverenlik əsasında inkişaf etdirməyə yönəlmişik”, – Paşinyan Facebook-da yazıb.

Bir gün əvvəl, yanvarın 14-də Rusiyanın xarici işlər naziri Sergey Lavrov Moskva ilə İrəvan arasında münasibətləri çətin adlandırıb. Eyni zamanda, o qeyd edib ki, “dialoq davam edir”. O cümlədən, Ermənistanın xarici işlər naziri Ararat Mirzoyan Rusiyaya dəvət olunub.

Azərbaycanın 2023-cü ilin sentyabrında Dağlıq Qarabağda keçirdiyi hərbi əməliyyatdan sonra Ermənistan hakimiyyəti müttəfiqləri öhdəliklərini yerinə yetirməməkdə ittiham edib və Qərbyönlü ritorikanı gücləndirib. Eyni zamanda, Avropa İttifaqına üzvlük prosesinə başlamaq üçün qanun layihəsini təsdiqləyib. Rusiya tərəfinin fikrincə, Aİ-yə üzvlük İrəvanın Aİİ-dən çıxması anlamına gəlir.

P.ƏMİRCANOV
XQ