Amerika prezidentinin Ukraynanın alyansa üzvlüyü ilə bağlı mövqeyini dəyişə biləcəyinə dair “ilkin əlamətlər” var.

ABŞ prezidenti Co Bayden 2025-ci ilin yanvarında vəzifəsini tərk etməzdən əvvəl Ukraynanın NATO-ya üzvlük müraciətinin statusunu dəyişməyə razı ola bilər. "Financial Times" adı açıqlanmayan qərb rəsmisinə istinadən yazır.

Bayden Ukrayna və müttəfiqlərinin oktyabrın 12-də Almaniyada keçiriləcək iclasına sədrlik edəcək. Nəşr yazır ki, Amerika prezidentinin Ukraynanın alyansa üzvlüyü ilə bağlı mövqeyini dəyişə biləcəyinə dair “ilkin əlamətlər” var. 

Bayden açıq şəkildə Ukraynanın NATO-ya üzvlüyünü dəstəkləyir, lakin alyansa qoşulmağa dəvət kimi üzvlüklə bağlı fəal hərəkətlərə müqavimət göstərir. Lakin NATO-ya üzvlük Ukrayna üçün əsas məqsəd olaraq qalır, baxmayaraq ki, alyansın 32 üzvündən çox az hissəsi bunun tam, davamlı atəşkəs və Ukrayna ərazisinin nə qədər hissəsinin qarşılıqlı müdafiə bəndinin əhatə etdiyini xəritədə aydın xətt olmadan mümkün ola biləcəyinə inanır. 

"Torpaq müqabilində NATO üzvlüyü yeganə həll yoludur, bunu hamı bilir. Heç kim bunu yüksək səslə deməyəcək... amma bu, yeganə strategiyadır", - adının açıqlanmasını istəməyən Qərb rəsmisi deyib. 

Bununla belə, həm Qərb, həm də Ukrayna əmindir ki, Rusiya Ukraynanın NATO-ya daxil olmasını və Qərblə yaxınlaşmasını çətin ki, qəbul etsin.

"Bizim üçün ən vacib şey təhlükəsizlik zəmanətləridir, əks halda bu, müharibəni bitirməyəcək, ancaq yeni bir müharibəyə səbəb olacaq",- mənbə deyib.

S.ELAY

XQ