NATO-ya üzv ölkələrin xarici işlər nazirlərinin Brüsseldə keçirilən iclasında Şimali Atlantika bloku üzvlərinin növbəti qeyri-rəsmi toplantısının 2025-ci ildə Türkiyədə keçirilməsi barədə qərar qəbul edilib. Məlumatı “Anadolu” verib. 

Bunu Türkiyənin xarici işlər naziri Hakan Fidan NATO-ya üzv ölkələrin xarici işlər nazirlərinin Brüsseldə keçirilən toplantısından sonra jurnalistlərə deyib: “Türkiyə 72 ildir NATO-nun mühüm üzvüdür. 72 ildir ki, NATO-ya töhfə verir. Silahlı qüvvələrimiz NATO missiyalarında fəal iştirak edir”.

Xarici işlər naziri NATO xarici işlər nazirlərinin 2025-ci ildə keçiriləcək qeyri-rəsmi toplantısının Türkiyədə keçirilməsini təklif etdiyini və bu təklifin qəbul olunduğunu bildirib.

“Biz NATO-ya üzv ölkələrin terrorla mübarizədə Türkiyəyə tam və qeyd-şərtsiz dəstək verməli, terrorla mübarizədə Türkiyənin yanında olması lazım olduğunu vurğuladıq və bəzi NATO-ya üzv ölkələrin, xüsusən də Suriyadakı terror təşkilatı ilə əməkdaşlıq etməməli olduqlarını vurğuladıq”, - türkiyəli nazir bildirib.

Fidan ABŞ dövlət katibi Antoni Blinkenlə ikitərəfli görüşdə müxtəlif məsələlərin, o cümlədən Türkiyə Prezidenti Rəcəb Tayyib Ərdoğanın ABŞ-a səfərinin müzakirə edildiyini bildirib. Onun sözlərinə görə, prezident Ərdoğanın gündəmində ikitərəfli və regional əlaqələr başda olmaqla, çoxlu məsələlər yer alacaq və Qəzza məsələsi onların arasında birinci yerdə olacaq.

P.ƏMİRCANOV
XQ