Son onillik bütün dünya üçün çox uğursuz oldu. Çində alovlanan pandemiya bütün dünyanı başına aldı. Enerji sarsıntıları və Yaxın Şərqdə lokal müharibələr dünya iqtisadiyyatına ağır zərbə vurdu. Nəticədə inflyasiyanın və işsizliyin səviyyəsi sürətlə qalxdı, Böyük Britaniya iqtisadaiyyatı isə resessiyaya uğradı.
“The Telegraph” bu hadisələrin fonunda Böyük Britaniyanın sosial-iqtisadi mənzərəsini cızmağa çalışır və yazır: “Staqflyasiya adlanan zəhərli proses siyasi qarışıqlıq yaradaraq ölkəyə zərbə vurdu. Həmkarlar ittifaqlarının aramsız tətilləri bir sıra sənaye sahələrini tamamilə iflic etdi. Qəzəbli ictimaiyyət bütün bu baş verənlərə görə, son dərəcə qeyri-sabit olan siyasi sistemi günahlandırdı və nəticədə on il ərzində beş hökumət, dörd baş nazir dəyişdi.
Adamda belə bir təəssürat yaranır ki, 2020-ci illərdə baş verənlər 1970-ci illəri təkrarlayır. Əgər leyborist Key Starmer növbəti seçkilərdə qalib gəlsə, paralellik demək olar ki, tamamlanacaq. Amma bəzi fərqlərin olacağını da inkar etmək olmaz. Nəhayət, axı 1973-74-cü illəri heç də əsassız yerə ötən əsrdə Böyük Britaniya üçün ən pis illər hesab etmirlər: inflyasiya 9 faizə qalxmışdı, yanacaq çatışmazlığı ölkəni iki illik tənəzzülə sürükləmişdi, hətta müəssisə və idarələr üç günlük iş həftəsinə keçməyə məcbur olmuşdular. Üstəlik, bütün bu hadisələrin baş verdiyi illərdə İngiltərə milli futbol komandası dünya çempionatına vəsiqə qazana bilməmişdi.
“The Telegraph” qeyd edir ki, bazarların son çərşənbə günü açıqlanan inflyasiya məlumatlarına kəskin reaksiyasını diktə edən də məhz bu hisslərdir. Onun göstəricilərinin 2023-cü ilin fevralından bəri ilk dəfə olaraq aylıq 3,9 faizdən 4 faizə yüksəldiyi məlum olanda, Britaniya Fond Birjasının FTSE 100 indeksi, demək olar ki, 2 faizə düşüb.
Bəzilərinə elə görünə bilər ki, bunlar həddindən artıq şişirdilir, çünki artımın əsas hissəsi tütün məmulatlarına daha yüksək tariflərlə şərtlənir, əsas inflyasiya isə sabit qalır. Lakin bu, Britaniya iqtisadiyyatının uçurumun kənarında olması üzündən yaranan həyəcanın daha da artdığını əks etdirir. Hətta aydın görünür ki, İngiltərə Bankı da dərəcəni 5,25 faizdən aşağı salmağa tələsmir və özünü sığortalamağa üstünlük verir.
İngiltərədə vəziyyət, həqiqətən, çox ciddidir. Bunu təkcə “The Telegraph” yazmır. İnflyasiya həyəcanverici dərəcədə sabitdir. İqtisadiyyat ciddi sarsıntıya məruz qalmaqla yanaşı, meydana çıxan bir çox problemlər də onun vəziyyətini daha da ağırlaşdırır: karantin, Rusiyanın Ukraynadakı xüsusi hərbi əməliyyatı və bununla əlaqədar enerji daşıyıcılarının qiymətlərindəki sıçrayış, Qırmızı dənizdə ticarət gəmilərinə hücumlar, Yaxın Şərqdə lokal münaqişə...
Bunlar öz yerində. İngiltərə nəşri yazır ki, Böyük Britaniya sübut edir ki, özü də inflyasiyanı “çox yaxşı” sürətləndirə bilər: davamlı karantinlər səbəbindən hökumət əldə etdiyi gəlirdən təxminən 400 milyard funt sterlinq daha çox borc alıb.
1973-cü ili böhran həddinə çatdıran həm də siyasi uğursuzluqlarla iqtisadi təlatümlərin üst-üstə düşməsi olmuşdu. Neftin qiyməti qalxanda hökumət kömürə üz tutmuşdu. Sonra mədənçilərin həmkarlar ittifaqları inflyasiyanın təsirini bir qədər yumşaltmaq ümidi ilə dərhal maaşların artırılmasını tələb etmişdilər. Gözlənilən nəticə dərhal özünü göstərmişdi və silsilə tətillər başlamışdı. Bundan əlavə, elektrik enerjisinin kommersiya təchizatının həftədə yalnız üç gün təmin ediləcəyi təhlükəsi yaranmışdı.
Nəşr yazır: “Enerji məhdudiyyətləri Britaniya iqtisadiyyatını cənginə alıb onu tamamilə iflic vəziyyətinə saldı. İstehlakçılar tezliklə aydınlaşdırdılar ki, məhsul çeşidi azalır və iqtisadiyyatın durğunluğuna baxmayaraq, bu, qiymətlərin artmasına səbəb olur”.
Əslində indinin özündə də İngiltərədə buna bənzər ssenarini təsəvvür etmək çətin deyil. Düzdür, mexanizmlər bir qədər fərqlidir. Şərhçilər qeyd edirlər ki, keçənilki tətillərin yaratdığı səs-küy və narahatlıqlara baxmayaraq, Britaniya siyasətində həmkarlar ittifaqlarının çəkisi və təsir imkanları artıq əvvəlki kimi deyil. 1970-ci illərdə onlar, həqiqətən, bütün işçilərin təxminən yarısını təmsil etdiklərini iddia edirdilər. Bu gün onların payı təxminən 20 faizə düşüb.
“The Telegraph” bütün günahı hökumətdə görür və bildirir ki, fəlakətə aparan “ən etibarlı yol” dövlət siyasətidir. Bir anlığa təsəvvür edin ki, Avropaya yanacaq xammalı idxalı yenidən pozulacaq. Bütün qitədə enerji daşıyıcılarının qiymətləri artacaq. Britaniyanın əmək bazarı bunu çox sakit qəbul edəcək. Real əmək haqqını saxlamaq üçün, həmkarlar ittifaqları ilə kəskin danışıqlar aparmadan, məşğulluğu yüksək saxlamaq mümkün olsa da, inflyasiya əmək haqqını “yeyəcək”. Yeni leyborist hökuməti işə qarışmayana qədər, sistem nəzərdə tutulduğu kimi işləməyə davam edəcək.
“Müavinətlərin dəqiq necə – inflyasiya əsasında və ya orta əməkhaqqı əsasında artırılmasının seçilməsinə gəlincə, hökumət öz büdcə qaydalarını pozaraq, birinci variantı seçir. Bu isə nəinki istehlak tələbinin (bununla bərabər həm də qiymətlərin), artmasına səbəb olacaq, həm də işləmək həvəsini söndürəcək”, – deyə “The Telegraph” yazır.
Müşahidələr göstərir ki, son iki ildə bu vəziyyətdə əksər britaniyalının zəif müqavimət yolu tutduğu açıq-aydın görünür. Bu da əsasən ondan irəli gəlir ki, vergi yüklərinin rekord həddə qaldırılması özü-özlüyündə insanların işləmək stimulunu məhv edir.
Əgər Starmer 2030-cu ilə qədər enerji sistemini “karbonsuzlaşdırmaq” planını irəli sürərsə, vəziyyət daha da pisləşəcək. O zaman Böyük Britaniya işıqların kütləvi şəkildə kəsilməsinə artıq təhlükəli dərəcədə yaxınlaşacaq, çünki indinin özündə ölkənin milli enerji sistemi artıq insanlara qənaət etmələrinə görə əlavə pul ödəyir, təklif isə tələb ilə zorla ayaqlaşır.
Bu gün ölkə qaranlıq və küləksiz günlərdə mədən yanacağı yandırmaqla keçinir - əsasən qazla işləyən elektrik stansiyaları fəaliyyət göstərir. Əlbəttə, bəzi tədbirləri gerçəkləşdirməklə, karbon qazının tutulması və saxlanması vasitələri ilə xalis sıfır hədəfinə çatmaq bəlkə də mümkündür. Lakin elektrik enerjisi istehsalında fasilələrlə bərpa olunan enerji mənbələrinin payı daim artdığından (tələbat kimi - xüsusən də qazla işləyən isitmə sistemlərini tədricən istilik nasosları əvəz etdikcə) mövcud güclərin kifayət etməyəcəyi istisna edilmir.
Çətin ki, leyboristlər mədən yanacağı ilə işləyəcək elektrik stansiyaları tikmək yolunu seçsinlər. Əlbəttə, nüvə layihələri son dərəcə əladır, lakin bunlar həddən artıq yüklənmiş İngiltərənin planlaşdırma sisteminin öhdəsindən gələ biləcəyi iş deyil. Beləliklə, qlobal enerji qiymətlərində qəfil sıçrayış olmasa belə, elektrik enerjisinin verilməsində fasilələrin olması ehtimalı böyükdür.
“Nəhayət, pul-kredit siyasətində səhv hesablamalar “tabuta vurulan son mismar” olacaq, - deyə “The Telegraph” yazır. “1970-ci illərdə həm hökumət, həm də İngiltərə Bankı faiz dərəcələrini artırmadan inflyasiyanı cilovlaya biləcəklərini güman edirdilər. Onların fikrincə, inflyasiya ilə mübarizənin ən etibarlı yolu qiymətlərə nəzarət, vergi dərəcələrinin dəyişdirilməsi və digər fiskal tədbirlərdən ibarətdir. Nəticədə 1975-ci ilə qədər inflyasiya, demək olar ki, 23 faizə çatdı ki, bu da son 700 ildə görünməmiş bir səviyyə idi.
Bugünkü İngiltərə Bankı inflyasiyaya nəzarət etməyin pul sahibi kimi hakimiyyətin məsuliyyəti olduğunu yaxşı bilir. Məsələ bundadır ki, onlar bunu çox pis həyata keçirirlər. Bankın son iki ildəki korlanmış nüfuzu inflyasiyanın sürətlə aradan qaldırıla biləcəyinə olan ümidləri puça çıxarmalıdır”.
Qəzet sonra yazır: “Beləcə, yeganə çatışmayan şey böhranın başlaması üçün bir təkandır”.
Hələ ki, Yaxın Şərqdəki lokal döyüşlərin əvvəlki kimi genişlənə və bütün regionu əhatə edə biləcəyi ehtimalı böyükdür. Qlobal ticarətin 12 faizinin Süveyş kanalından və qlobal neft ixracının 20 faizinin Hörmüz boğazından keçdiyini nəzərə alsaq, istənilən geniş münaqişə təchizatı kəskin şəkildə azaldacaq və qiymətlər sürətlə qalxacaq. Eyni şeyi Çinin ərazi bötövlüyünü bərpa etmək üçün Tayvana hücum perspektivi və bunun ardınca gələcək iqtisadiyyatın Şərq və Qərbə bölünməsi haqqında da demək olar.
“The Telegraph” sonda belə yazır: “Bunlar yalnız ən gerçək problemlərdir. Kataklizmlərin xüsusiyyətləri ondadır ki, mahiyyətinə görə onları proqnozlaşdırmaq çətindir. “Sıfır emissiya”sının ardınca qaçıb, İngiltərə Bankının səhv hesablamaları və ümumi siyasi iğtişaşlar səbəbindən biz 1973-cü il hadisələrinin təkrarlanması ilə üz-üzə qala bilərik”.
Hazırladı:
İlqar RÜSTƏMOV
XQ