ABŞ-ın Kolorado ştatının Ali Məhkəməsi ölkənin sabiq prezidenti Donald Trampı ştatın 2024-cü il seçki bülletenindən çıxarıb. Buna səbəb kimi onun 2021-ci il yanvarın 6-da tərəfdarlarının Kapitoliyaya hücumu ilə nəticələnən qiyamda iştirak etdiyi göstərilib. Məlumatı “Anadolu” verib.
Məhkəmənin müvafiq qərarı 3 səs əleyhinə olmaqla 4 səslə qəbul edilib.
Qərara əsasən, Respublikaçı namizədlərin mübarizə aparacağı Koloradoda 2024-cü il martın 5-də keçiriləcək ilkin seçkilərdə Trampın adı bülletendə yer almayacaq.
Məhkəmə Trampın 6 yanvar 2021-ci il hadisələri zamanı hərəkətlərinin "qiyam və üsyan" cinayətlərinə bərabər olduğu və Konstitusiyanın 14-cü maddəsinin pozulması anlamına gəldiyi barədə qərar qəbul edib.
Qeyd edək ki, bu qərarla Tramp ABŞ tarixində çox nadir hallarda tətbiq edilən 14-cü düzəliş çərçivəsində Ağ Ev sahibi seçilmək hüququnu itirmiş hesab edilən ilk prezidentliyə namizəd olub.
P.ƏMİRCANOV
XQ