Yarandığı gündən etibarən istifadəçilərin diqqətini çəkən məşhur sosial media platforması olan “İnstagram”da Türkiyə ikinci yeri tutur. “Anadolu” agentliyindən (AA) verilən məlumata görə, bu ölkə 153,6 milyon aktiv hesab sayı ilə platformada ikinci olub.
Siyahıya 263,3 milyon hesabla Hindistan başçılıq edir, üçüncü yerdə isə 119,6 milyon aktiv hesabla Braziliya qərarlaşıb.
Dünyada ən çox ziyarət edilən “İnstagram” veb-saytının aylıq istifadəçi sayı 12,8 milyarddan çoxdur. Hər gün 500 milyon insanın daxil olduğu platformaya indiyədək təxminən 50 milyard fotoşəkil yüklənib.
Qeyd edək ki, “İnstagram” istifadəçilərinin 47,2 faizi qadın, 52,8 faizi isə kişidir. Hesab sahiblərinin 70 faizi 25-34 yaş qrupunda olan istifadəçilərdir. Onların gün ərzində platformada orta hesabla cəmi 32 dəqiqə vaxt keçirdikləri bəlli olub.
S.FİDAN
XQ
