Rusiya Elmlər Akademiyasının Arxeologiya İnstitutunun əməkdaşları Moskva vilayətinin Vereya şəhərində aparılan qazıntılar zamanı Napoleon ordusunun zabitinə məxsus artefakt - möhür tapıblar.
Misdən hazırlanmış möhürdə əlində bıçaq tutmuş hərbçi təsvir olunub. Möhürün üzərində D, L,v, G latın hərfləri həkk olunub. Arxiv sənədlərinə baxış təsdiq edir ki, möhür 1812-ci il Fransa-Rusiya müharibəsinin iştirakçısı, 6-cı Vestfaliya xətt alayının zabiti Lui von Gadenştedin olub. O, 1812 - ci ildə Vereyanı rus ordusunun generalı İvan Doroxovun fransızlardan azad etdiyi zaman əsir alınıb, sonralar sağ-salamat vətəninə qayıdıb. Onun şəxsi möhürü isə 200 ildən çox torpaq altında tarixi dəlil kimi qalıb.
Rusiya Elmlər Akademiyasının Arxeologiya İnstitutunun direktor müavini Asya Enqovatova deyir ki, arxeoloji qazıntılar zamanı tapılan minlərlə artefakt arasında elə gözlənilməz, xüsüsi diqqətə layiq olana rast gəlinir ki, bu tapıntı insanlarda o dövrün dolğun mənzərəsini göz önündə canlandırmağa imkan yaradır.
Z. QURBANƏLİQIZI, “Xalq qəzeti”
