ABŞ Aerokosmik Agentliyi (NASA) kəşflərini və kosmos araşdırmalarını daha yaxşı nümayiş etdirmək üçün “NASA+” adlı platforma quracağını açıqlayıb.
Kosmik agentlik hazırda öz saytında buraxılış və digər tədbirləri canlı yayımlasa da, “NASA+”da təkcə canlı yayımlar deyil, həm də orijinal video seriyalar və sənədli filmlərin kolleksiyaları təqdim ediləcək. Platforma hər kəs üçün pulsuz və reklamsız olacaq.
Yeni platforma iOS və android proqramları vasitəsilə mobil cihazlarda əlçatan olacaq. Həmçinin platformaya masaüstü və mobil brauzerlərdən, Apple TV, Fire TV kimi media pleyerlərindən də daxil olmaq mümkündür.
NASA-nın kommunikasiya ofisindən Mark Aktifd deyib: “Yeni yayım platforması ilə kosmosu sizə daha yaxın edəcəyik. NASA-nın havada və kosmosda naməlum obyektləri necə araşdırdığını, kəşflər vasitəsilə bəşəriyyətin xeyrinə etdiyi yenilikləri təqdim edəcəyik.”
Əfsanə ƏHƏDLİ, “Xalq qəzeti”