“Facebook”un sahibi “Meta” şirkəti “Twitter”ə rəqib olaraq inkişaf etdirdiyi “Threads” platformasını ictimaiyyətə təqdim edib. “Instagram” ilə birlikdə işləyəcək proqram “Google Play” və “App Store”da yerini alıb. İlk 7 saat ərzində 10 milyon insan proqrama qoşulub.
Platformada ilk paylaşımı şirkətin CEO-su Mark Zukerberq edib. “Düşünürəm ki, bir milyarddan çox insanın istifadə edəcəyi ictimai söhbət proqramı olmalıdır. “Twitter” bu şansını itirdi. Ümid edirəm ki, biz bunu bacaracağıq” – deyə o bildirib.
“Twitter”dəki “twit”lər, “Threads”da “treds” adlanır. Platformada rəmz limiti 500-dür, lakin “Twitter”də bu rəqəm əksər istifadəçilər üçün 280-dir.
Qeyd edək ki, hazırda sosial şəbəkələrdə ən trend mövzulardan biri “Threads”dir. Platforma eyni anda 100 ölkədə mövcud olsa da, Avropa Birliyində istifadəçilər üçün əlçatan deyil. Səbəbi isə AB-nin nizamnamələridir.
Əfsanə ƏHƏDLİ, “Xalq qəzeti”
