Gürcüstanın hakim “Gürcü Arzusu” partiyasının sədri İrakli Kobaxidze Ukrayna prezidenti Vladimir Zelenskinin Gürcüstanın sabiq prezidenti Mixail Saakaşvilinin müalicə üçün Kiyevə göndərilməsi tələbini tənqid edib. Onun sözlərinə görə, belə tələblər qəbuledilməzdir.
“Mixail Saakaşvili ilə əlaqəli olan Ukrayna prezidenti Vladimir Zelenskinin dünənki addımına gəlincə, mən bu mövzuya dərindən girmək istəmirəm ki, bu, müharibə vəziyyətində olan ölkənin prezidentinə aiddir. Ümumiyyətlə, Ukrayna hakimiyyətinin mövqeyi, əlbəttə ki, təhqiramizdir”, - deyə cənab Kobaxidze (Sputnik Gürcüstandan sitat gətirib) məsələyə münasibət bildirib.
Onun sözlərinə görə, Mixail Saakaşvili iki il əvvəl gizli şəkildə Gürcüstana gələndə Ukrayna rəsmiləri ona fəal kömək ediblər ki, bu da suveren dövlətin işlərinə qarışmaqdır. “Gürcü Arzusu” liderinin sözlərinə görə, Gürcüstan rəhbərliyi Ukrayna ilə yaxşı münasibətlər saxlamaq və qonşu ölkə ilə “ən azı birtərəfli dostluq rejimində” qalmaq istəyir, lakin Kiyev hakimiyyətinin hərəkətləri buna kömək etmir.
Bir gün əvvəl, iyulun 3-də Mixail Saakaşvili 2007-ci il noyabrın 7-də müxalifətin mitinqinin dağıdılması və iş adamı Badri Patarkatsişvilinin “İmedi” televiziya şirkətinin ələ keçirilməsi işi üzrə növbəti məhkəmə iclasında onlayn iştirak edib. O, hakimiyyəti onu tükənmə həddinə çatdırmaqda günahlandırıb. Hazırda eks-prezident Vivamed klinikasındadır. Onun tərəfdarları Mixail Saakaşvilinin son dərəcə ağır vəziyyətindən və həyatı üçün təhlükədən danışırlar. Ukrayna prezidenti Vladimir Zelenski bu ərəfədə Gürcüstan hakimiyyətini Mixail Saakaşvilini azad edib Kiyevə təhvil verməyə çağırıb.
"Xalq qəzeti"
