Son illər Türk dövlətləri arasında iqtisadi əlaqələrin genişləndirilməsi istiqamətində mühüm tədbirlər həyata keçirilir, əməkdaşlığın yeni inkişaf mərhələsi üçün hüquqi baza yaradılır. Azərbaycan Respublikasının Prezidenti İlham Əliyevin təşəbbüsü ilə Türk Dövlətləri Təşkilatının dövlət başçılarının martın 16-da Ankarada keçirilmiş fövqəladə zirvə görüşündə qəbul olunmuş qərarlar, imzalanmış sənədlər də bu baxımdan diqqət çəkir.
Məlumat üçün bildiririk ki, Türk Dövlətləri Təşkilatı türkdilli ölkələr arasında siyasət, iqtisadiyyat, elm, təhsil, nəqliyyat və turizm sahələrində əməkdaşlığı genişləndirmək məqsədi ilə yaradılmış dövlətlərarası blokdur. Qurumun üzvləri Azərbaycan, Qazaxıstan, Qırğızıstan, Türkiyə və Özbəkistandır. Macarıstan, Türkmənistan və Şimali Kipr Türk Respublikası isə təşkilatda müşahidəçi statusuna malikdir.
Fövqəladə zirvə görüşünün açılışında çıxış edən Prezident Rəcəb Tayyib Ərdoğan Ankara Sammitində türkdilli ölkələr arasında iqtisadi əlaqələrin inkişafına mühüm töhfə verəcək qərarların qəbul olunacağını vurğulayaraq bu baxımdan Türk İnvestisiya Fondunun yaradılmasına dair qərarı xüsusi qeyd edib. Dövlət başçısı bu Fondun üzv ölkələr arasında infrastruktur, nəqliyyat, kənd təsərrüfatı, turizm, alternativ enerji və digər sahələrdə əməkdaşlığın daha da inkişafına mühüm töhfələr verəcəyini bildirib.
Xəzər hövzəsində Türk dünyası ölkələri ilə neft, təbii qaz və elektrik enerjisi sahələrində irimiqyaslı layihələrin birlikdə uğurla həyata keçirildiyini vurğulayan Prezident Rəcəb Tayyib Ərdoğan deyib: “Bakı-Tbilisi-Ceyhan boru kəməri 16 ildir Azərbaycan, Türkmənistan və Qazaxıstan neftini dünya bazarlarına fasiləsiz çatdırır. Onurğa sütununu TANAP-ın təşkil etdiyi Cənub Qaz Dəhlizi sayəsində Türk dövlətləri Avropanın enerji təhlükəsizliyinin təmin olunmasında mühüm rol oynayırlar”.
Avropanın enerji xəritəsinin zənginləşdirilməsinə xidmət edən Cənub Qaz Dəhlizinin əsas seqmenti sayılan Trans-Anadolu qaz kəməri (TANAP) layihəsi də məhz Türkiyədə həyata vəsiqə alıb. Xatırladaq ki, 2012-ci il iyun ayının 26-da İstanbul şəhərində “Azərbaycan Respublikası Hökuməti və Türkiyə Respublikası Hökuməti arasında Trans-Anadolu təbii qaz boru kəməri sisteminə dair” Saziş imzalanmış və sonradan hər iki ölkənin müvafiq qanunverici orqanları tərəfindən təsdiq edilmişdi. Məlum olduğu kimi, təbii qazın “Şahdəniz” və Azərbaycanın digər yataqlarından Avropa bazarlarına nəql edilməsi potensialına görə mühüm siyasi və iqtisadi əhəmiyyət daşıyan TANAP boru kəməri 2018-ci ildə istismara verilib. Artıq 4 ilə yaxındır ki, bu kəmər “Şahdəniz” yatağından çıxarılan təbii qazı Türkiyə ərazisinə, oradan isə Cənub Qaz Dəhlizinin sonuncu seqmenti olan Trans-Adriatik boru kəmərilə Avropa bazarlarına daşıyır.
Türkiyə Prezidenti Rəcəb Tayyib Ərdoğan Türk Dövlətləri Təşkilatının fövqəladə zirvə görüşündən sonra keçirdiyi mətbuat konfransı zamanı bildirib ki, Türk İnvestisiya Fondunun təsis müqaviləsinin imzalanması sammitin konkret addımları sırasında xüsusi yer tuturdu. Fondun Türk dünyasında iqtisadi inteqrasiyanı sürətləndirəcəyini vurğulayan dövlət başçısının dediyinə görə, bərabər sərmayə töhfəsi və Türk dünyasında bərabər səs hüququ əsasında qurulacaq fonda İstanbul evsahibliyi edəcək.
Ekspertlərin fikrincə, Fond gələcəkdə Türk dövlətlərinin inteqrasiyasının sürətləndirilməsinə və birgə layihələrin maliyyələşdirilməsinə mühüm töhfələr verəcək. Fondun yaradılması Türk Dövlətləri Təşkilatının dövlət başçılarının Ankarada keçirilmiş zirvə görüşündə qəbul olunmuş Bəyannamədə də öz əksini tapıb. Belə ki, dövlət başçıları Türk dünyasının ticarət, nəqliyyat, investisiya, turizm, regional əlaqə və strateji insan resurslarının idarə edilməsi sahələrində əməkdaşlığın və koordinasiyanın dərinləşdirilməsi və gücləndirilməsində təşkilatın daim artan mərkəz rolunu vurğulayaraq Türk Dövlətləri Təşkilatının üzv dövlətləri arasında ticarət və iqtisadi əməkdaşlığı gücləndirmək üçün onların iqtisadi potensialını səfərbər etmək məqsədi daşıyan Türk İnvestisiya Fondunun yaradılması haqqında Sazişin imzalanmasını alqışlayıblar.
Türk İnvestisiya Fondunun Qarabağda işləyən sahibkarlara maliyyə dəstəyi göstərəcəyi də əsas hədəflər sırasındadır. Prezident İlham Əliyev sammitdə işğaldan azad olunmuş ərazilərimizin bərpası istiqamətində həyata keçirilən tədbirlərdən, bu prosesdə dost, qardaş ölkələrin fəal iştirakından məmnunluğunu ifadə edərək deyib: “Keçmiş məcburi köçkünlərin öz doğma yurdlarına dönüşü üçün “Böyük Qayıdış” proqramının icrasına başlamışıq. Yenidənqurma prosesində Türkiyə şirkətləri podratçı kimi bir çox infrastruktur layihələrində fəal iştirak edirlər. Bu günə qədər Türkiyə şirkətləri ilə imzalanmış kon-traktların dəyəri 3 milyard ABŞ dollarından çoxdur... Fürsətdən istifadə edərək, işğaldan azad edilmiş Füzuli rayonunda Özbəkistan tərəfindən tikilən məktəbə və Qazaxıstan tərəfindən inşa olunan yaradıcılıq mərkəzinə görə Özbəkistan Prezidenti Şavkat Mirziyoyevə və Qazaxıstan Prezidenti Kasım-Jomart Tokayevə minnətdarlığımı bildirirəm”.
Yeri gəlmişkən, Türk İnvestisiya Fondunun ilkin kapitalının 450 milyon dollar təşkil edəcəyi gözlənilir. Bir il ərzində isə bu rəqəmin bir milyard dollara çatdırılması planlaşdırılır. Fondun büdcəsi dövlət vəsaitləri və maliyyə təşkilatlarının vəsaitləri hesabına formlaşacaq.
Eldəniz ƏMİROV,
iqtisadçı-ekspert
Türk İnvestisiya Fondunun yaradılması ideyası 2015-ci ildə irəli sürülüb. Ötən müddətdə Türk Dövlətləri Təşkilatının toplantılarında bu məsələ dəfələrlə müzakirə olunub. 2021-ci ildən isə proses fəal müzakirələr mərhələsinə qədəm qoyub. Belə ki, həmin ilin sentyabr ayında Bakıda keçirilən Türkdilli Dövlətlərin Əməkdaşlıq Şurasına üzv ölkələrin iqtisadiyyat nazirlərinin 10-cu görüşü çərçivəsində Türk İnvestisiya Fondunun yaradılması ilə bağlı qərar verilib. Belə bir qərarın qəbul edilməsində məqsəd üzv ölkələrdə infrastrukturun inkişaf etdirilməsi, biznesin maliyyələşdirilməsi və investisiya layihələrindəki maliyyə çatışmazlığı ilə bağlı maneələrin aradan qaldırılması naminə əlavə resursların səfərbər edilməsindən ibarət olub.
Nəhayət, Türk Dövlətləri Təşkilatının Özbəkistanın Səmərqənd şəhərində keçirilən 9-cu sammitində Türk İnvestisiya Fondunun yaradılması haqqında qərara imza atılıb. Türk dövlətləri tərəfindən yaradılan ilk və əsas ortaq maliyyə qurumu olan bu fond təşkilata üzv olan Türk dövlətlərinin iqtisadi potensialını onlar arasında ticari-iqtisadi əməkdaşlığı gücləndirmək və birgə layihələr həyata keçirmək üçün səfərbər etmək məqsədi daşıyır. Fond, əsasən, kiçik və orta biznesi özünün vəsaitləri və digər səlahiyyətli maliyyə institutları vasitəsilə maliyyələşdirməklə dəstəkləyəcək. Burada söhbət, əsasən, kənd təsərrüfatı, logistika və nəqliyyat, enerji səmərəliliyi, bərpa olunan və alternativ enerji, informasiya və kommunikasiya texnologiyaları istehsalında sənaye layihələri, turizm, infrastruktur layihələri, dövlət-özəl tərəfdaşlıq layihələri, insan inkişafı və yaradıcı sənayelərə aiddir.
Türk dövlətləri tərəfindən yaradılan ilk və əsas ortaq maliyyə qurumu olan bu fond təşkilata üzv olan Türk dövlətlərinin iqtisadi potensialını onlar arasında ticari-iqtisadi əməkdaşlığı gücləndirmək və birgə layihələr həyata keçirmək baxımından mühüm əhəmiyyət kəsb edir. Fond kiçik və orta biznesin maliyyələşdirilməsi, iri infrastruktur obyektlərinin tikintisi və üzv ölkələrin sahibkarları arasında təmasların qurulmasına mühüm töhfələr verəcək. Bütövlükdə isə, fond üzv ölkələrdə infrastrukturun inkişafı, biznesin maliyyələşdirilməsi və müəyyən ölkələrin həyata keçirdikləri investisiya layihələrində maliyyə çatışmazlığını aradan qaldırmaq üçün əlavə resursların səfərbər edilməsinə kömək edəcək.
Mirbağır YAQUBZADƏ,
“Xalq qəzeti”