"Ulduz" dərgisinin və "Xalq qəzeti"nin ortaq layihəsi olan "Ulduz"lu görüşlər" davam edir.
Xalq qəzeti Tv-nin informasiya dəstəyi ilə gerçəkləşən layihənin ilk görüşü Azərbaycan Dövlət Pedaqoji Universitetinin professor, tələbə, müəllim heyəti ilə keçirilib.
Növbəti görüş Azərbaycan Dövlət İqtisad Universitetinin nəzdində fəaliyyət göstərən Azərbaycan Maliyyə-İqtisad Kollecində reallaşıb. Görüşdə "Ulduz" jurnalının baş redaktoru, Əməkdar jurnalist, şair Qulu Ağsəs, baş redaktor müavini, yazıçı Təranə Vahid, şöbə redaktorları şair Dayandur Sevgin və Taleh Mansur, eləcə də Azərbaycan Yazıçılar Birliyinin Mətbuat xidmətinin rəhbəri, şair Xəyal Rza iştirak ediblər.
Öncə qonaqları təhsil ocağının direktoru, h.f.d dosent Davud Davudov qəbul edib.
Səmimi söhbətdən sonra kollecin akt zalında görüşün əsas hissəsi baş tutub. Kollecin direktor müavini t.f.d Murad Muradov görüşü açaraq, qonaqları 90 illik tarixə malik təhsil ocağında görməkdən məmnunluğunu dilə gətirib.
Görüş zamanı Qulu Ağsəs, Xəyal Rza, Dayandur Sevgin və Taleh Mansur öz fikirlərini bölüşüblər, şeirlərini səsləndiriblər.
Yazıçı Təranə Vahid tələbələrə öz tövsiyə və məsləhətlərini verib, onları maraqlandıran sualları cavablandırıb.
Səmimi ortamda keçən görüşün sonunda tələbələrə "Ulduz" jurnalının müxtəlif sayları hədiyyə edildi, xatirə fotosu çəkildi.
"Ulduz"lu görüşlər" yeni ildə, yeni ünvanlarda keçiriləcək.
XQ
