Göygöl rayonunun Keşkü kəndi bu həftəsonu təbiət və əyləncənin birləşdiyi möhtəşəm bir tədbirə evsahibliyi edir. II Moruq Festivalı, yerli fermerlərin zəhmətini və bölgənin unikal kənd təsərrüfatı məhsullarını dünyaya tanıtmaq, eləcə də turizmi inkişaf etdirmək məqsədilə keçirilir.
Festival Göygölün təbii gözəlliklərini dünyaya tanıtmağı hədəfləyir və bununla yanaşı, kənd təsərrüfatının və aqroturizmin inkişafına töhfə verməyi qarşısına məqsəd qoyur. Göygöl artıq uzun illərdir ki, moruq istehsalı ilə məşhurdur, bu faydalı giləmeyvə isə son illərdə sənaye üsulu ilə geniş ərazilərdə əkilir və becərilir.
Festivalın təşkilatçıları arasında Kənd Təsərrüfatı Nazirliyi, Dövlət Turizm Agentliyi, “AzerGold” və bir çox digər dövlət və özəl qurumlar yer alır. Bu möhtəşəm tədbir bölgənin turizm sektorunu inkişaf etdirməklə yanaşı, moruq istehsalını daha geniş auditoriyaya tanıtmaq məqsədini daşıyır.
Keşkü kəndinin təbii sərvətlərindən biri olan moruq festivalın mərkəzi mövzusudur. Göygöl rayonu, xüsusilə dağlıq ərazilərində, moruq istehsalı ilə məşhurdur. Burada yetişən “Polka” və “Polyana” sortları isə yüksək məhsuldarlığı ilə fərqlənir. Moruq tərkibində olan dəmir, qlükoza və fruktoza sayəsində həm təbii müalicəvi xüsusiyyətlərə, həm də ürək-damar və beyin sağlamlığını dəstəkləyən faydalara malikdir.
Festivalın məqsədi, moruq istehsalçılarına yalnız öz məhsullarını tanıtmaqla kifayətlənməyib, onlara yeni işgüzar əlaqələr qurmaq və iqtisadiyyata töhfə verməkdir. Ziyarətçilər festivalda yerli istehsalçılar tərəfindən təqdim olunan müxtəlif moruq növlərini dadma imkanı əldə edəcək və sevdikləri məhsulları alacaqlar.
Festival yalnız moruq məhsulunun nümayişi və satışından ibarət olmayacaq. Ziyarətçilər üçün müxtəlif interaktiv zonalar təşkil ediləcək. Kənd təsərrüfatı məhsullarının sərgi-satış yarmarkası, moruq təsərrüfatı guşəsi, ustad dərsləri, rəsm çəkmək üzrə xüsusi dərslər və daha çox maraqlı tədbir festival iştirakçılarının diqqətini çəkəcək.
Əyləncənin dozası isə açıq havada keçiriləcək konsertlər və idmançıların nümunəvi çıxışları ilə artırılacaq. Xüsusi kampinq zonası da ziyarətçiləri qarşılayacaq, bura gələnlər təbiət qoynunda, moruq meyvələrinin ləzzətini dadarkən, açıq havada qalmaq imkanı əldə edəcəklər.
Göygölün təbiətindəki harmoniyanı yaşamaq və təbiətin müxtəlif rəngləri ilə tanış olmaq istəyənlər üçün II Moruq Festivalı ideal bir fürsət təqdim edir. Hər gün saat 10:00-dan 21:00-a qədər açıq olacaq festivalda minlərlə insanın iştirak edəcəyi gözlənilir. Keşkü kəndində təşkil edilən bu tədbir, bölgənin gələcəkdəki iqtisadi inkişafı və kənd təsərrüfatı sektorunun müasir trendlərə uyğun olaraq inkişaf etməsinə mühüm töhfələr verəcək.
Bu festival yalnız moruq istehsalının təbliği üçün deyil, həm də Göygöl rayonunun mədəniyyətini, təbiətini və zəngin turizm potensialını dünyaya tanıtmaq üçün mühüm bir platformadır.
Hamlet QASIMOV,
XQ-nin bölgə müxbiri,
Göygöl rayonu
