Malayziyanın Selanqor ştatının inzibati mərkəzi Şah Alam şəhərinin Pustaka Raca Tun Uda kitabxanasında kitab forumu keçirilib.

Forumda Azərbaycan Respublikası Diasporla İş üzrə Dövlət Komitəsinin maddi dəstəyi ilə malay dilində nəşr olunan Azərbaycan yazıçılarının hekayələrindən ibarət “Ürəkdə yazı” (“Coretan Hati”) antologiyası ictimaiyyətə təqdim edilib.

Tədbirə Azərbaycanın Malayziyadakı səfiri İrfan Davudov, Malayziya yazıçıları, müxtəlif universitetlərin müəllim və tələbələri, ictimaiyyət nümayəndələri qatılıb.

Forumda İTBM nəşriyyatının direktoru və yazıçılar kitabdakı hekayələrin malay oxucusunda Azərbaycan ədəbiyyatı haqqında yaratdığı təsəvvürlər barədə öz fikirlərini bölüşüb. Azərbaycanın Malayziyadakı səfiri İrfan Davudov kitabın ərsəyə gəlməsi ideyasından söz açıb, Azərbaycan ədəbiyyatı haqqında ümumi məlumat verib.

Kitabın tərcüməçisi Həbib Zərbəliyev foruma onlayn qoşularaq Azərbaycan ədəbiyyatı, antologiyadakı müəlliflər və onların hekayələri, həmçinin iki ölkə arasındakı mədəni əlaqələr barədə geniş məruzə ilə çıxış edib. Azərbaycan ədəbiyyatı haqqında ona ünvanlanan sualları cavablandırıb.

P.ƏMİRCANOV
XQ