Mütəxəssislər bildirirlər ki, qan dövranı pozulduqda bütün orqanların fəaliyyətində nasazlıq yaranır. Onların fikrincə, damarların işini qaydasında saxlamaq elə xəstəliklərdən uzaq olmaq deməkdir. Bunun üçün insan nə yeyib-içdiyinə mütləq nəzarət etməlidir. Həkimlərin verdiyi açıqlamaya görə, qan dövranına kömək edən və onun işini ləngidən qidaları öyrənmək lazımdır.
Qan dövranı sisteminin dostları çuğundur, kök, qaraciyər və almadır. Çuğundur damar genişləndirici və qanyaradıcı xüsusiyyətlərə malikdir. Tərkibində dəmir və mis yüksək olduğundan anemiyanın qarşısını almaq üçün qida rasionumuza daxil edirik. Kök çiy şəklində qan dövranını mükəmməl şəkildə stimullaşdırır və pis xolesterinlə mübarizə aparır. Tərkibindəki kalium sayəsində hipertoniya, ateroskleroz və varikoz damarlarında yaxşı kömək edir. Qaraciyər iltihab əleyhinə xüsusiyyətlərə malikdir.
Alma dəmirlə zəngindir. Çox qan itkisi və anemiyada faydalıdır. Tərkibindəki vitaminlər və minerallar kompleksi ürək-damar sistemini gücləndirir. Qəbul edildikdə orqanizmə zərər verən məhsullar isə şəkər, duz və nikotindir. Bunları qan dövranı sisteminin düşmənləri adlandırırlar.
Şəkər, qanı, sözün əsl mənasında, “şərbətə” çevirir və qan damarlarının divarlarını kövrək və həssas edir. Duz aterosklerozun inkişafına səbəb olur və tromb əmələ gəlməsi prosesində fəal iştirak edir. Nikotin ateroskleroz, hipertoniya və ürək çatışmazlığına səbəb olur.
Çalışaq dostlara yaxın, düşmənlərdən uzaq olaq!
Z.HÜSEYNLİ
XQ
