Azərbaycan Turizm Bələdçiləri Assosiasiyası, Macarıstandakı Azərbaycan Evi ilə birgə, Azərbaycan mədəniyyətinin, tarixi və təbii gözəlliklərinin macar auditoriyasına tanıdılması məqsədilə maraqlı bir mədəniyyət təqdimatı təşkil edib. Bu silsilə tədbirlər çərçivəsində keçirilən mərasimə Azərbaycan Turizm Bələdçiləri Assosiasiyasının üzvü, xanım Török Timea rəhbərlik edib.
AZƏRTAC xəbər verir ki, təqdimatda Azərbaycanın müxtəlif turizm məkanları haqqında ətraflı məlumat verilib və xüsusi olaraq Bakının möhtəşəm memarlığına diqqət çəkilib.
İştirakçılar UNESCO-nun qoruması altında olan İçərişəhərin zəngin irsi, neft baronlarının mirası və müasir memarlıq inciləri - Heydər Əliyev Mərkəzi və Ağ Şəhər kimi görməli yerlər barədə məlumatlandırılıblar. Tarixi və müasir memarlıq nümunələrinin bir araya gətirildiyi bu təqdimat, Bakının unikal şəhər mənzərəsini canlı şəkildə videoçarx vasitəsilə nümayiş etdirib.
Tədbirin əsas məqamlarından biri, Azərbaycanın zəngin şərabçılıq mədəniyyətinin qeyd edilməsi olub. Qonaqlar “AzGranata” Şərab Zavodu tərəfindən təqdim edilən yerli şərabların dadına baxmaq imkanı əldə ediblər. Təqdim olunan şərablar arasında “Bayanşira” və “Mədrəsə” kimi yerli növlər, eləcə də “Saperavi” və “Sauvignon Blanc” kimi beynəlxalq sevimlilər yer alıb. Şərab dequstasiyası, Azərbaycan şərablarının keyfiyyətini və müxtəlifliyini vurğulamaqla yanaşı, iştirakçılar üçün unudulmaz bir mədəni təcrübə olub.
Təqdimat və şərab dequstasiyasından əlavə, tədbirdə Azərbaycan rəqsləri nümayiş etdirilib və mədəniyyət proqramına dinamik bir element əlavə olunub. İştirakçılara, həmçinin təqdimatçılarla əlaqə yaratmaq, suallar vermək və Azərbaycana səfərlər planlaşdırmaq üçün imkanlar yaradılıb.
Bu tədbir, Azərbaycan və Macarıstan arasında mədəni əlaqələrin gücləndirilməsi istiqamətində uğurlu bir addım olaraq qeyd edilib və macar auditoriyasına Azərbaycanın zəngin mədəni irsi və müasir təklifləri barədə daha dərin bir anlayış qazandırıb.
Vüqar Seyidov
AZƏRTAC-ın xüsusi müxbiri
Budapeşt
