Qərbi Azərbaycan İcmasının Xaçmazda Şimal bölgəsi rayonlarının təhsil işçiləri ilə keçirdiyi görüşdə qaçqın soydaşlarımızın ulu yurda qayıdışı ilə bağlı görülmüş işlər, qarşıda duran vəzifələr diqqət mərkəzində olub.
Elm və Təhsil Nazirliyinin məsul əməkdaşı Rövşən Ağayev belə görüşlərin keçirilməsinin yüksək əhəmiyyət daşıdığını vurğulayaraq bildirib ki, Azərbaycan xalqının tarixi yaddaşında və milli şüurunda əzəli yurd yerimiz olan Qərbi Azərbaycan həqiqətləri önəmli yer tutur. O qeyd edib ki, ermənilərin azərbaycanlılara qarşı müxtəlif illərdə törətdiyi zorakı hərəkətlərin, xüsusilə soydaşlarımızın öz doğma yurdlarından zorla qovulmasına ümummilli lider Heydər Əliyevin verdiyi siyasi qiymət və Prezident İlham Əliyevin Qərbi Azərbaycana Qayıdış hərəkatına göstərdiyi rəsmi dəstək icmanın hazırlıq tədbirlərinin strateji yol xəritəsidir.
Görüşdə qeyd edilib ki, Ulu öndərin dediyi aşağıdakı sözlər Qayıdış hərəkatının yoluna gur işıq salır: “Mən inanıran, mən tam inanıram ki, hər şey ədalət naminə dəyişəcək bütün bölgədə. Mütləq, mütləq siz gələcəkdə hələ gedib öz gözəl Göyçə torpağınızı da görəcəksiniz. Öz doğma dağlarınızı, bulaqlarınızı, çaylarınızı da görəcəksiniz. Ata-babalarınızın qəbirlərini də görəcəksiniz. Mən buna heç şübhə etmirəm”. Prezident İlham Əliyevin uzaqgörən siyasəti və qətiyyətli liderliyi sayəsində 2020-ci ilin Vətən müharibəsi və 2023-cü ilin antiterror əməliyyatı nəticəsində Azərbaycanın ərazi bütövlüyünü tam bərpa etməsindən sonra Qərbi Azərbaycandan olan soydaşlarımızın da vaxtilə didərgin salındıqları ata-baba yurdlarına qayıdacağına inamı artıb.
Qərbi Azərbaycan İcmasının Xaçmaz rayonu üzrə sədri Bəxtiyar Haqverdiyev isə bildirib ki, görüşün əsas məqsədi təhsil müəssisələrində çalışan Qərbi Azərbaycan qaçqınları ilə sıx ünsiyyət qurmaq, tarixin müxtəlif dönəmlərində ermənilərin törətdikləri deportasiya və soyqırımları barədə həqiqətləri gündəmə gətirmək, Böyük Qayıdış Proqramından irəli gələn vəzifələri müzakirə etmək və fikir mübadiləsi aparmaq, günün suallarını cavablandırmaqdır. Bununla bərabər, düşmənin xarabalığa çevirdiyi qədim yurd yerlərimizin xalqımızın doğma vətəni olduğunu yenidən bütün dünyaya çatdırmalı, Qərbi Azərbaycanda yaradılmış mədəni irsi qoruyub yaşatmaq üçün səyləri birləşdirməliyik. Prezident İlham Əliyevin qeyd etdiyi kimi: “ Qərbi Azərbaycandan olan hər bir insan öz ulu babalarının yaşadıqları yerləri yaxşı bilir. İndi müxtəlif yollarla bu informasiyanı əldə etmək olar”.
Xaçmaz şəhər 2 nömrəli tam orta məktəbin təsərrüfat işləri üzrə direktor müavini Məmməd İmamquliyev erməni millətçilərinin zaman-zaman onlara qarşı təcavüz və vandallıq əməlləri törətdiklərini bildirib. O, dədə-baba torpaqlarından köçkün düşmələrindən, onlara vurulan yaralardan, erməni vəhşiliklərindən qorunmaq üçün kahalarda gizlənmələrindən, təzyiq və haqsızlıqlara məruz qalmalarından, işgəncələrdən söz açıb.
Xaçmaz şəhər 7 nömrəli tam orta məktəbin direktoru Şamama Nəsirova, Quba rayonu İsnovqışlaq kənd tam orta məktəbin müəllimi Mahirə Nəbiyeva, Siyəzən rayonu Gilgilçay stansiya tam orta məktəbin müəllimi Nəcibə Əfəndiyeva, Quba rayonu Qaraçay qəsəbə tam orta məktəbin müəllimi Nüşabə Allahverdiyeva, Quba Rayon Peşə Liseyinin müəllimi Rəhim Qədirov ötən əsrdə Qərbi azərbaycanlıların davamlı olaraq soyqırımı və deportasiyalara məruz qalmalarından söz açıblar. Natiqlər Qərbi Azərbaycanın qədim dövrlərdən bəri xalqımızın doğma vətəni olduğunu sübut edən faktlardan, bu yerdə yaradılmış mədəni irsin qorunmasından və qayıdış hərəkatında bu özülə əsaslanmağın zəruriliyindən danışıblar.
Qərbi Azərbaycan İcmasının sektor müdiri Əbdüləli Həsənov müzakirə edilən mövzunun aktuallığına və əhəmiyyətinə toxunub. İcmanın koordinatoru İmam Məmmədov Qərbi Azərbaycan ərazilərinə tarixi, mədəni və hüquqi baxışlar əsasında qayıdışın yollarından danışıb. Onlar qeyd ediblər ki, bu gün Azərbaycan Qarabağda və Şərqi Zəngəzurda bərpa-yenidənqurma işləri həyata keçirir, məcburi köçkünlərimiz öz doğma yurdlarına qayıdırlar. Qərbi azərbaycanlı vətəndaşlarımız da öz dədə-baba yurdlarına qayıdıb orada yaşamalıdırlar.
Sonda Qərbi Azərbaycan tarixini əks etdirən və gələcək nəsillərə çatdıran dərs vəsaiti və monoqrafiyaların hazırlanmasının vacibliyi qeyd edilib.
T.RÜSTƏMLİ
XQ
