Prokurorluq orqanlarının fəaliyyətinə olan ictimai maraq nəzərə alınaraq mayın 30-da Gəncə Şəhər Prokurorluğunun inzibati binasında “Açıq qapı günü” keçirilib. Aksiyada media və qeyri-hökumət təşkilatlarının nümayəndələri, gənclər iştirak ediblər.
“Açıq qapı”nın keçirilməsində məqsəd prokurorluq əməkdaşları üçün yaradılmış iş şəraiti, istifadədə olan kriminalistik texnika, habelə prokurorluğun tarixi keçmişi ilə ictimaiyyəti tanış etmək olub. Qonaqlara prokurorluq orqanlarında aşkarlıq və şəffaflığın, vətəndaş məmnunluğunun təmin olunması, habelə ictimaiyyətlə əlaqələrin möhkəmləndirilməsi istiqamətində həyata keçirilən ardıcıl tədbirlər barədə danışılıb, Azərbaycan Respublikasının Baş Prokurorluğunda müvafiq olaraq həyata keçirilmiş hüquqi-institusional islahatlarla bağlı iştirakçılara məlumat verilib.
Tədbir zamanı açılış nitqi ilə çıxış edən Gəncə şəhər prokuroru Azad Qarayev qonaqları salamlayaraq, şəhər prokurorluğunun fəaliyyəti, cinayətkarlığa qarşı aparılan mübarizə tədbirləri, habelə insan hüquq və azadlıqlarının müdafiəsi naminə görülən işlər barədə danışıb.
Baş Prokurorluğun mətbuat xidmətinin böyük prokuroru Kənan Zeynalov prokurorluq orqanlarının ictimaiyyətlə əlaqələr sahəsi üzrə fəaliyyətinə toxunub, regional media və qeyri-hökumət təşkilatlarının nümayəndələri ilə səmərəli əməkdaşlığın əhəmiyyətindən bəhs edib.
Tədbir zamanı şəhər prokurorluğunun təcrübəli əməkdaşları qurumun fəaliyyəti barədə açıqlama veriblər.
İnzibati bina barədə məlumatlandırılan iştirakçılar əməkdaşlar üçün yaradılmış iş şəraiti ilə də tanış olublar. Onlara “Elektron prokurorluq” informasiya sistemi əyani olaraq nümayiş etdirilib.
Kriminalistik avtomobil və avadanlıqlarla tanış olan qonaqlara istintaq hərəkətlərinin keçirilməsi zamanı müasir texnikadan istifadənin əhəmiyyəti izah olunub, iştirakçılarla fikir mübadiləsi aparılıb, prokurorluq orqanlarının fəaliyyəti ilə bağlı onları maraqlandıran suallar cavablandırılıb.
Hamlet QASIMOV,
XQ-nin bölgə müxbiri,
Gəncə şəhəri
