Qonağımız beynəlxalq sülh mükafatçısı Bəxtiyar Siracovdur
Hələlik yeganə azərbaycanlı “nobelçi” olan soydaşımız bu ali beynəlxalq mükafata 19 il əvvəl Atom Enerjisi üzrə Beynəlxalq Agentliyin proqram təminatının yaradılmasında fəal iştirakına görə layiq görülüb. 26 il bu qurumda çalışmış, bunun son 16 ilini departament rəhbəri olmuş soydaşımız 3 ildir ki, təqaüdə çıxıb.
Xidməti fəaliyyəti ilə bağlı uzun illər xüsusi şərtlər altında işləmiş Bəxtiyar Siracovun Vətənlə əlaqələrində artıq heç bir məhdudiyyət yoxdur. Ötən illərdə soydaşımızın Azərbaycan adına qazandırdığı tarixi uğurun sevincini az-çox yaşasaq da, onunla canlı təmaslara indi imkan yaranıb. Təqaüdə çıxandan sonra yaşadığı Vyana şəhərində fəal diaspor fəaliyyətinə qoşulan “nobelçi” həmyerlimizlə Azərbaycana budəfəki gəlişində illər uzunu fürsət gözlədiyimiz görüş, nəhayət, baş tutdu.
Şöhrətli qonağımızı redaksiyamızda salamlayan və gecikmiş təbriklərimizi ona üzbəüz çatdıran “Xalq qəzeti”nin baş redaktoru Əflatun Amaşov 2005-ci ildə Atom Enerjisi üzrə Beynəlxalq Agentliyin yeni proqram təminatının yaradılmasında səmərəli fəaliyyəti ilə dünyada sülh prosesinə verdiyi önəmli töhfəyə görə Nobel sülh mükafatına layiq görülmüş Bəxtiyar Siracovun bu misilsiz uğurunun ölkəmizin elm və ictimai fəaliyyət sahəsində yeni bir səhifə açdığını vurğuladı. Baş redaktor bildirdi ki, soydaşımızın Vətəndən uzaqdakı nailiyyətləri xalqımızı hədsiz sevindirib, hamımızda haqlı öyünc yaradıb. Onunla bağlı yeniliklər həmişə redaksiyamızın diqqət mərkəzində olub.
Nobel sülh mükafatçısı görüşdən məmnunluğunu ifadə edərək bildirdi ki, hələ Bakıda orta və ali təhsil aldığı və çalışdığı illərdən “Xalq qəzeti”nin oxucusu olub. Qəzetdə Azərbaycanı ölkədən kənarda tanıdan görkəmli adamlar barədə verilən yazıları xüsusi maraqla oxuyub. Azərbaycan naminə dünyada əks-səda verən fəaliyyətlə məşğul olmaq arzusu da onda həmin dövrdə yaranıb. Aldığı ali mükafat isə onu şəxsi uğurundan daha çox, Vətəni ilə bağlı önəmli bir ilk olduğana görə sevindirib.
Görüşdə Bəxtiyar Siracovun mənalı və şərəfli ömür yoluna ətraflı nəzər salındı. Dünyada sülh prosesinə layiqli töhfə vermiş bir alimin 30 il xalqımızla birgə Qarabağ münaqişə və müharibəsinin ağrısını yaşaması hamını bir daha təsirləndirdi. Bu zaman ona belə bir sual verildi: “Qarabağda separatçılığı və terrorçuluğu aşkar dəstəkləmiş fırıldaqçı iş adamı Ruben Vardanyanın Nobel sülh mükafatına təqdim edilməsi nə deməkdir”. Beynəlxalq sülh mükafatçısının cavabı qısa və qeyri-siyasi oldu: “Nobel sülh mükafatının verilməsində insan qanı axıdılması ilə bağlı heç bir anlayış yoxdur. Bu mükafat sülhün qorunmasına, müharibə və savaşların qarşısının alınmasına xüsusi xidmətə görə verilir.
Uzun illər Azərbaycandan kənarda yaşasa da, həmişə xalqımızın sevincini və kədərini onunla bərabər paylaşan Bəxtiyar müəllim ömrünün fəxri istirahət mərhələsini də Vətən naminə dəyərli işlərə həsr etmək yolu şeçib. O, dünyada yaşayıb fəaliyyət göstərən alim soydaşlarımızın elmi qurumunun yaradılması təşəbbüsünü gerçəkləşdirən tanınmışlarımızdan biridir. Diaspor hərəkatını Azərbaycan dəyərlərini dünyada yaymaq istiqamətində fəallaşdırmaq üçün də soydaşımız maraqlı layihələrlə çıxış edir. Gənclərin elmi işə yüksək amal və yeni hədəflərlə qoşulmasını təşviq etmək də Bəxtiyar Siracovun qarşısına qoyduğu növbəti ictimai vəzifələrdəndir.
Görüşdə dünya şöhrətli alimimizlə sıx əməkdaşlıq etmək, onun elmi və vətənpərvərlik layihələrinə informasiya dəstəyi verməklə bağlı razılıq da əldə edildi. Xalqımızın misilsiz yurd sevgisi, yüksək elmi dühası, qurub-yaratmaq istedadı, öyünclü keçmişi söhbətlərin ana xətti oldu. Bütün bu dəyərlərə sadiqliyinə görə qonağımıza kollektivimizin sevgi-sayğısı sərgiləndi.
Görüşdə toxunulan məsələlər, səslənən suallarla bağlı ayrıca müsahibə qəzetimizin növbəti saylarından birində dərc ediləcək.
Tahir AYDINOĞLU
XQ
