Ramazan bayramı cənub bölgəsinin ən böyük rayonlarından olan Masallıda da fərəh və sevinclə qeyd edilir. Hər tərəfdə abadlıq işləri görülür, səliqə-sahman yaradılır, ağsaqqal və ağbirçəklər, eləcə də sosial qayğıya ehtiyacı olanlara baş çəkilir.
Ötən günlərdə də bayram öncəsi rayonun bir çox ərazilərində təmizlik işləri görülüb, yollar cari təmir edilib. Rayonun Çaxırlı kəndi ərazisində icra nüməyəndəliyinin təşkilatçılığı, bələdiyyə və kənd sakinlərinin dəstəyi ilə 3 kilometrlik yol qreyderlə hamarlanıb, yüzlərlə metr sahəyə çınqıl döşənərək yayılıb. Bədəlan kəndində I Qarabağ müharibəsi şəhidi Davud Qulamovun adına olan küçə cari təmir edilib, Bakı–Astara yolunun Təklə ərazisindən keçən dolaylarında isə ağacəkmə aksiyası təşkil olunaraq, 600-dən çox şam ağacı basdırılıb, 1 kilometr uzunluğunda kənddaxili yol sakinlərin köməyi ilə qaydaya salınıb.
Təklə kəndində rayon rəhbərliyinin əhali ilə görüşündə icra hakimiyyətinin başçısı Araz Əhmədov camaatı bayram münasibətilə təbrik edib, vətəndaşları narahat edən bütün məsələlərin diqqətdə saxlandığını bildirib. Görüş zamanı qaldırılan məsələlərdən bir neçəsi yerindəcə həll olunub, digər məsələləri operativ araşdırmaq barədə müvafiq qurumlara tapşırıqlar verilib.
Ərkivan qəsəbəsində isə müqəddəs Ramazan ayının və orucluğun başa çatması münasibətilə xeyriyyə aksiyası keçirilib. İştirakçılar əvvəlcə qəsəbənin mərkəzindəki “Şəhidlər Parkı”nı ziyarət edib, abidə kompleksinin qarşısına gül dəstələri düzüb və Vətən uğrunda döyüşlərdə canlarından keçmiş qəhrəmanların ruhuna dualar oxuyublar.
Sonra bayram aksiyası “Həsənəküçə mərasim evi”ndə davam edib. “Ərkivan Xeyriyyə Cəmiyyəti”nin sədri Cəfər Cəfərov çıxışında bildirib ki, aksiya ehtiyacı olan hər kəsi sevindirmək məqsədi daşıyır. Şəhid atası Habil Rəhimov, ağsaqqal Səyədulla Abbasov Ramazanın fəzilətlərindən danışıb, bu bayramın milli-dini və mənəvi dəyərlər sistemində xüsusi yeri olduğunu vurğulayıblar. Natiqlər qəsəbə sakinləri adından aksiyanın təşkilatçılarına minnətdarlıqlarını bildiriblər. Daha sonra xeyriyyə cəmiyyətinin könüllüləri bol nemətli 210 sovqat bağlamasını şəhid ailələri və qazilər də daxil olmaqla, qəsəbənin aztəminatlı ailələrinə çatdırıblar.
Ə.ƏLİYEV
XQ