“Facebook”da dostluğumda olan tanınmış yazıçı-dramaturq Firuz Mustafa bu günlərdə Bakı metropolitenində şahidi olduğu bir olayla bağlı paylaşım edib. Orada deyilir:
“...Metro stansiyalarımıza söz olmaz. Yaraşıqlı, gur işıqlı, səliqə-sahmanlı, üstəlik də keçiddə dayanan polislərin sərnişinlərlə mədəni rəftarı... Həqiqətən, bütün bunlar çox gözəldir. Amma və lakin...
Mən daha çox “Nizami” stansiyasından istifadə edirəm. Adətən, “Dərnəgül”dən “Həzi Aslanov” stansiyasına gedən qatarlara minirəm. İnsafan, xəttə çox vaxt səliqəli, türkiyəli və iranlı arkadaşlarımız demiş, “xəfif” qatarlar buraxılır. Di gəl ki, bu gün (2 fevral–red) saat 19.30 radələrində elə bir qatar zühur etdi ki, təsvir etməyə söz tapmaq belə olmur.
Bu köhnə-körüş qatardakı vaqonların səs-küyü, cırıltısı qulaq batırırdı. Qatar gah xəstə heyvan kimi xırıldayır, gah da suvuran güclü nasos kimi fışıldayırdı. Hətta, mübaliğəsiz deyim ki, vaqonların hərdən zökəm olmuş adam kimi öskürməyi də vardı... Öhö-öhö...
Yaxınlığımda 2 kişi vardı. Hə, vaqonda... Rəng-ruflarından, geyim-kecimlərindən xarici vətəndaş olduqları bilinirdi. Təhər-tövrünü yuxarıda qısaca təsvir etdiyim, səliqəsiz boyanmış bu sürünən, öskürən, asqıran, fınxıran qatar “28 May” stansiyasına çatanda dərindən nəfəs alıb at kimi kişnədi və xırp yerində dayandı.
Əcnəbilərdən biri tutacaqdan bərk-bərk yapışıb ucadan qışqırdı:
– O, boje moy...
Eşidənlər gülüşdülər. Elə əcnəbilər də...
Qatarın yerinə xəcalət çəkdim. Yəqin ki, təkcə mən yox...
Nə yaxşı ki, bu qatarlar elektriklə işləyir. Yoxsa tüstüsü göz çıxarardı.
...Hə, orasını da deyim ki, Zaqafqaziyada hələ 1868-ci ildə Gədəbəydə almanların tikib istifadəyə verdiyi dəmiryol xəttində hərəkət edən qatar, öz səliqə-sahmanına görə heç də bu gün istifadəyə buraxılmış qatardan geri qalmırmış. Bunu alman sahibkar Simensin xatirələrindən və həmin qatarın fotosundan da aydın görmək olur...
Özünüz hesablayın, 1868-dən bu yana aradan neçə il keçib?
(Bu, Cənubi Qafqazdakı ilk qatarın fotosudur).
İnanmaq çətin olsa da Firuz müəllimin dediyinə şübhəmiz olmadı. Firuz müəllim, siz deyən tarixdən 156 il keçib.
Təqdim etdi:
M.HACIXANLI
XQ
