Ponomaryov–Çerenkov dueli
39 il əvvəl, 1985-ci il aprelin 7-də Bakıda Respublika stadionunun tribunalarından 18 min azarkeşin izlədiyi 48-ci SSRİ çempionatının “Neftçi”—“Spartak” Moskva görüşü “dinc” nəticə ilə başa çatsa da (2:2), hamı 90 dəqiqə ərzində gərgin, məzmunlu və məhsuldar oyundan əsl zövq aldı. Meydan sahiblərinin də, qonaqların da əvvəldən axıradək nümayiş etdirdikləri hücum futbolu və tamaşaçılardan qazandıqları alqış sədaları oyunun şahidlərinə görüşün xatirələrdə çox yaşayacağını düşünməyə ciddi əsas verirdi.
Matçın başlıca xüsusiyyəti isə qapıçımız Vyaçeslav Çanovu da, onun moskvalı məşhur həmkarı, bir çox il ərzində Sovet İttifaqı yığma komandasının şərəfini müvəffəqiyyətlə qorumuş Rinat Dasayevi də məyus edən qolların müəlliflərinin eyni futbolçular, üstəlik də, yarımmüdafiəçilər olması idi. Spartakçılardan 2 dəqiq zərbə ilə Fyodor Çerenkov fərqləndi, “Neftçi”-də isə oyunun qəhrəmanı bu klubun tarixində ən parlaq simalardan biri İqor Ponomaryov oldu.
Həmçinin diqqətçəkən məqamdır ki, Ponomaryov da, Çerenkov da hərəyə bir topu ümumittifaq dərəcəli hakim Miroslav Stuparın (İvano-Frankovsk) təyin etdiyi penalti ilə vurdular. Həmin görüş futbolumuzun tarixində həm də Ponomaryov–Çerenkov dueli kimi yaşayır.
Fevralın 24-də 64 yaşı tamam olacaq Azərbaycan futbolunda yeganə olimpiya çempionu, SSRİ Əməkdar idman ustası, “Şöhrət” ordenli İqor Anatolyeviç Ponomaryov hazırda Azərbaycan Premyer Liqasında çıxış edən “Sabah” klubunun Müşahidə Şurasının üzvü və idman direktorudur, Fyodor Çerenkov isə 2014-cü ildə, 55 yaşında vəfat etmişdir.
Oqtay BAYRAMOV,
Əməkdar jurnalist
