XQ UNESCO-nun 8 Mart təşəbbüsünə necə qoşulmuşdu?
Şəxsi arxivimdə “Xalq qəzeti”nin 8 mart 2000-ci il tarixli nömrəsindən bir nüsxə var. Mərhum baş redaktorumuz Mahal İsmayıloğlunun imzaladığı və 7467 nüsxə tirajla çap olunmuş 6 səhifəlik nömrənin 1-ci səhifəsinin yuxarı sağ küncündə XXI əsrə 299 gün qaldığı bildirilir. Nömrənin yenə yuxarı sol hissəsində isə belə yazılıb: “YUNESKO-nun (indi UNESCO-O.B.) “8 martda informasiyanı qadınlar hazırlayır” təşəbbüsünə qoşulan “Xalq qəzeti”nin bugünkü nömrəsini redaksiyanın qadın əməkdaşları hazırlamışlar”.
Düşünürəm ki, aradan 24 il keçdikdən sonra və ya XXI əsrin dörddəbirinin arxada qaldığı bir vaxtda, üstəlik də, növbəti 8 Mart ərəfəsində həmin nömrəni xatırlamağa imkan yaranıb.
Nömrə 8 Mart – Beynəlxalq Qadınlar bayramına həsr olunmuş təntənəli mərasimdə Azərbaycan Prezidenti Heydər Əliyevin nitqini oxuculara çatdıran AzərTAC-ın (indi-AZƏRTAC) “Bayramınız mübarək, əziz qadınlar!” sərlövhəli materialı ilə açılır. Ulu öndərin nitqindən iki abzası bir daha oxuyaq:
“Mən bu əziz bayram günü Azərbaycanın şəhid analarını, qaçqın-köçkün vəziyyətində yaşayan, çadırlarda yaşayan qadınları böyük hörmət-ehtiramla yad edir və onlara bu salondan bütün Azərbaycan qadınlarının adından, bizim hamımızın adından bayram salamı göndərirəm.
Qadınlar bir belə əziyyət, zəhmət çəkərkən nə istəyirlər? Sadəcə, onlara diqqət, qayğı, hörmət, ehtiram! Bu anlayışlar çox genişdir. Diqqət də, qayğı da müxtəlif formalarda ola bilər. Ancaq kişilər gərək qadınları həmişə yüksəkdə görsünlər, qadınlara gərək xüsusi hörmət etsinlər, qadınlara diqqətli yanaşsınlar”.
“Xalq qəzeti”nin əməkdaşları Zərifə Bəşirqızı, Təranə Nuriyeva, Əsli Xəlilqızı və Ağanisə Sultanova da qəzetin həmin nömrəsi üçün bayrama layiq materialların hazırlanmasında az zəhmət çəkməmişlər. Onlarla yanaşı, həmkarları Pərvanə Sultanova, Şəlalə İbrahimova, Sərmayə Bahadurqızı, T. Əliyeva, Hökumə Feyziqızı, Zeynəb Zamanova da müxtəlif peşə sahibləri olan Azərbaycan qadınları haqqında səmimi yazıları, reportaj və müsahibələri ilə bayrama öz töhfələrini vermişlər.
Beşinci səhifədəki bir yazı isə o vaxtlar bütün kollektivin çox əziyyətini çəkmiş qəzetin kompüter xidmətində çalışan qızlara həsr edilmişdir. Ağanisə Sultanovanın bu xanımlara minnətdarlıqla qələmə aldığı “Bizim qızlar” sərlövhəli məqaləni kiçik ixtisarla yenidən oxucuların diqqətinə çatdıraq.
“Təranə xanım (Allah T.Mədətovaya rəhmət eləsin-O.B.) və onun komandası – Vəfa, Aynur, Gülbəniz, Nigar, Günay, Sona, Gülnarə. Əslində onları bir-birindən ayırmaq, hansısa haqqında fərqli söz demək çətindir. Elə bil qəzetimizin kompüter xidmətində çalışan bu qızları xüsusi olaraq seçiblər. Hamısı mehriban, səmimi, üzügülər… Qəzetimizdə dərc edilən bütün yazıların ilk oxucuları da onlar olur. Bəzən öz şəxsi problemləri olsa belə, iş prosesində bunu hiss etdirmirlər.
Hər gün onlarla bir neçə dəfə ünsiyyətdə oluram. Və düşünürəm ki, işinə məsuliyyət hissi ilə bərabər hamımız bir-birimizə qarşı bu qızlar kimi mehriban, səmimi olsaydıq, dünya necə də gözəl olardı.
Bəzən iş vaxtı başa çatsa da, təcili nömrəyə hazırlayacağımız materialdan ötrü qayıdıb, yenidən kompüter arxasına keçirlər. Hər gün onları ən çox “yoran”, deyəsən, bizim siyasət şöbəsi olur”.
Redaksiyadan: Ürəkdən gələn çox səmimi sətirlərdir. Veteran həmkarımıza bu xatırlatmasına görə təşəkkür edirik.
Oqtay BAYRAMOV,
Əməkdar jurnalist
