Azərbaycanın Pakistandakı səfirliyi bu ölkənin Milli Müasir Dillər Universitetində (MMDU) fəaliyyət göstərən Azərbaycan Dili və Mədəniyyəti Mərkəzində 20 Yanvar şəhidlərinin anım gününə həsr olunan “20 Yanvar – Azərbaycan tarixinin qəhrəmanlıq salnaməsi” adlı seminar keçirib.

     Seminarda universitetin müəllim-tələbə heyəti, bu ölkənin beyin mərkəzlərinin nümayəndələri, eləcə də səfirlik əməkdaşları iştirak edib.

     Azərbaycanın Pakistandakı səfiri Xəzər Fərhadov bu il 20 Yanvar faciəsinin 34-cü ildönümünün anıldığını bildirib, Azərbaycanın müstəqilliyi, habelə ölkəmizin suverenliyi və ərazi bütövlüyü uğrunda canlarından keçən qəhrəman şəhidlərin xatirəsinin dərin hörmətlə yad edildiyini söyləyiib. Tariximizə Qanlı Yanvar kimi daxil olan bu hadisənin təkcə faciə kimi deyil, eyni zamanda müstəqillik uğrunda xalqımızın apardığı azadlıq mübarizəsinin zirvəsi kimi Azərbaycan tarixinə həkk olunduğunu vurğulayıb. 

     X.Fərhadov Azərbaycan xalqının sabiq SSRİ rəhbərliyinin ayrı-seçkilik siyasətinə, yüz minlərlə azərbaycanlının indiki Ermənistan ərazisindəki tarixi torpaqlarından deportasiya edilməsinə və Ermənistanın Azərbaycanın Qarabağ bölgəsinə qarşı əsassız ərazi iddialarına cavab olaraq kütləvi etirazlar keçirdiyini vurğulayıb və xalqımızın başlatdığı milli azadlıq hərəkatını güc yolu ilə yatırmaq məqsədilə Sovet ordusunun beynəlxalq hüququ və Konstitusiyanı kobudcasına pozaraq dinc əhaliyə qarşı misli görünməmiş qırğın törətdiyini diqqətə çatdırıb.

     Səfir Ümummilli Lider Heydər Əliyevin 1990-cı il yanvarın 21-də Azərbaycanın Moskvadakı Daimi Nümayəndəliyinə gələrək xalqımız ilə həmrəylik nümayiş etdirdiyini, bu cinayəti kəskin şəkildə pislədiyini, günahkarların cəzalandırılmasını tələb etdiyini bildirib. Məhz xalqın tələbi ilə Ulu Öndər Heydər Əliyevin hakimiyyətə gəlməsindən sonra onun birbaşa təşəbbüsü ilə 20 Yanvar faciəsinə dövlət səviyyəsində siyasi-hüquqi qiymət verildiyini qeyd edib. 

     X.Fərhadov Müzəffər Ali Baş Komandan, Prezident İlham Əliyevin rəhbərliyi altında Azərbaycan Ordusunun torpaqlarımızı erməni işğalından azad etdiyini və ölkəmizin suverenliyini və ərazi bütövlüyünü bərpa etdiyini vurğulayıb. Diplomat bu gün Azərbaycanın müstəqilliyi, habelə ölkəmizin suverenliyi və ərazi bütövlüyü uğrunda canlarından keçən qəhrəman şəhidlərimizin ruhunun şad olduğunu bildirib.

     Seminarda çıxış edən MMDU-nun xarici dillər fakültəsinin dekanı professor Cəmil Əsgər Cami və Pakistanın Davamlı inkişaf üçün Qlobal Strateji İnstitutunun icraçı direktoru Məhəmməd Şakil Əhməd Azərbaycan xalqını böyük keçmişi olan böyük xalq adlandıraraq 20 Yanvar hadisələrindən söhbət açıb və bu hadisənin Azərbaycan xalqının azadlıq mübarizəsinin simvolu olduğunu bildiriblər. Çıxışçılar Azərbaycanın Vətən müharibəsindəki qələbəsindən də danışaraq ölkəmizin müstəqilliyi, suverenliyi və ərazi bütövlüyü  uğrunda canlarından keçən şəhidlərin xatirəsini hörmətlə yad ediblər.

Qulu Kəngərli 

XQ-nin xüsusi müxbiri

İslamabad