Soyuq çöl-bayırda isti duyğular

Şənbə günü gündüz saatlarından təkəm-seyrək yağmağa başlayan qar, təxminən, 22.00 radələrində güclənərək tezliklə paytaxtın küçə və meydanlarını, həyət və parklarını, ağacları, evlərin damlarını, bir sözlə, hər yeri ağ örpəyə bürüdü. 

Elə həmin anlarda şair dostum Həzi Həsən­linin “Facebook”da yerləşdirdiyi qarla bağlı bu səmimi misraları qarşıma çıxdı: 

Bağımıza, bağçamıza qar yağdı, 

Ağaclarım ağ duvağa büründü, 

Elə bildim noğultək nübar yağdı,

Qar yenə şəkərdən şirin göründü.

Bu misraları təzəcə oxumuşdum ki, həyət­dəki futbol meydançasında uşaqların səs-küylə “top qovduq”larını gördüm. Balaca futbolçular 10-15 santimetrlik qarın üzərində oynamaqdan, bəlkə, daha çox, sürüşüb-yıxılmaqdan zövq alır­dılar. 

Uşaqlar qarın üstündə elə şövqlə qaçışırdı­lar ki, adam qeyri-ixtiyari onların arasında olmaq arzusuna düşürdü. Bir müddət sonra artıq bir neçə yaşlı “tamaşaçı” da meydançanın ətrafına gələrək azarkeşlik etməyə başladılar. 

Səhərisi bazar günü idi. Tezdən iş yoldaşım, “XQ”nin fotomüxbiri Elşən Ağalara zəng edəndə, gənc həmkarım ağzımı açmamış dilləndi ki, “müəl­lim, narahat olmayın, qarla bağlı “bomba kadr-lar” çəkmişəm. Ertəsi gün redaksiyaya gələndə Elşən vəd etdiyi fotoları bir-bir mənə göstərdi. Söylədi ki, bunlar, əsasən, “Keşlə” qəsəbəsində və Dənizkənarı bulvarda çəkilib. Fotolardan bir neçəsini seçib dərc etməyi qərara aldıq. 

Yeri gəlmişkən, qarın yağmağı ilə son 2 gün ərzində sosial şəbəkələrdə çox sayda paylaşım­lar edildi. Xalq şairləri Nəbi Xəzri, Musa Yaqub, Cabir Novruz və başqalarının bu mövzuda qələmə aldıqları bir-birindən gözəl poeziya nü­munələri yada düşdü, rəylər yazıldı. 

Sosial şəbəkə izləyicilərinin bir çoxu öz pay­laşımlarında qarlı-buzlu, şaxtalı-sazaqlı havada sərhədlərimizi qoruyan igid əsgər və zabitlərimizi alqışlayır, eyni zamanda, ürəklərindən dillərinə axan dualarını əsirgəmirdilər. Ana və bacıların kövrək və qürurlu sözlərini, həqiqətən, həyəcan­sız oxumaq olmur. Bəli, Vətən qəhrəman oğulları ilə yenilməzdir! 

Bəzi paylaşımlarda yeni ilin ilk qarının şəhə­rin su, işıq, təbii qaz təchizatında problemlər ya­radacağı ilə narahatlıqlar dilə gətirilirdi. İnsafən, bu dəfə bu sahələrdə ciddi problemlər yaranma­dı. Görünən budur ki, şəhər təsərrüfatının mü­vafiq qurumları vəzifələrinə daha məsuliyyətlə yanaşıblar. Təki həmişə belə olsun! 

M.HACIXANLI,
E.AĞALAR (foto)
XQ