Hamının arzuladığı gün gəldi: Gəncədən başlamış ta gözəllər gözəli Göygölə kimi hər tərəf ağ örpəyə büründü. Gəncənin park və meydanlarında, yol kənarlarında qartopu oynayan uşaqların sevinc dolu səsləri bir-birinə qarışıb.
Əvvəllər qar yağanda əksəriyyət gileylənərdi, “əşi, bizə qar yaraşmır, maşınlar sürüşür, hər yer palçıq olur”, – deyirdilər. Amma indi Gəncədə hara baxırsan, qar təmizləyən, duzlu qum səpən maşınlara rast gəlirsən. Kommunal Təsərrüfatı İstehsalat Birliyinin işçiləri gecədən yollara çıxıb fədakarlıqla çalışırlar.
İcra hakimiyyəti başçısının müavini, şəhər təsərrüfatı şöbəsinin müdiri Kamran Məhərrəmov deyir ki, bu sahədə müəyyən bir bir sistem yaradılıb. Fövqalədə hallar zamanı fəhlədən tutmuş mühəndisə, idarə rəhbərinə kimi hər kəs öz vəzifəsini bilir. Niyazi müəllimin təşəbbüsü ilə Gəncəyə kifayət qədər texnika alınıb gətirilib. Yaydan bütün hazırlıqları görmüşük və buna görə də çətinlik çəkmirik.
...Göygöl rayonu ərazisinə daxil oluruq. Hələ də sökülməmiş yaraşıqlı yolka diqqətimizi cəlb edir. Qara bürünən ağacın yarpaqları daha təbii, daha gözəl görünür. Son vaxtlar yenidən bərpa edilən tarixi memarlıq abidələri, almanlardan qalmış yaşayış evləri gecədən yağan qarı sanki qoyunlarında saxlamaqla öyünür, onu gəlib-keçənlərə nümayiş etdirirlər.
Təsadüfən rayon icra hakimiyyətinin şöbə müdiri Ariz Eyvazovla rastlaşıram. Uzun illərdir tanıyıram, təcrübəli dövlət qulluqçusu, rayonda sayılıb-seçilən ziyalılardandır. Məni görən kimi “müəllim, ilk qarımız mübarək!” deyib hal-əhval tutur. Deyir ki, Göygöl rayon sakinləri qarlı-şaxtalı havalara az-çox öyrəşsələr də, son vaxtlar onlar da qarı həsrətlə gözləyirdilər.
Ariz müəllim buradan Hacıkəndə, oradan da Göygölə gedəcəyimizi bilib çox inamla: “Arxayın gedin, yol işçiləri bürün tədbirləri görüblər, ətraf qar topaları olsa da, yol sürüşkən deyil, qarşısını alıblar”, – deyir.
Doğrudan da dağların, təpələrin qoynuna dolaşan, Hacıkənd meşələrinin arasından keçən yol çox rahatdır. Bəzi yerlərdə maşınımız sürüşsə də, elə bir ciddi narahatlıq doğurmur. Təbii ki, bir gecədə və gündüz saatlarında bu qədər qar yağdıqdan sonra yolları tam təmizləmək o qədər də asan iş deyil.
Nəhayət, füsunkar Göygöl ərazisinə daxil oluruq. Qoruğun direktoru Fuad Quliyev deyir ki, bu əraziyə 20-25 santimetr qar düşüb. Hazırda Azərbaycan Avtomobil Yolları Dövlət Agentliyinin aidiyyatı əməkdaşları tərəfindən Göygöl Milli Parkının ərazisindən keçən asfalt yollarda qarın kürünməsi və duzlu qumlanması icra olunur.
Biz də direktorun dediklərinin şahidi oluruq. Turistlər belə havada Göygölə gəlməyə daha çox həvəs göstərirlər. Burada qış fəslində də istirahət üçün hər cür şərait yaradılıb. Gölün kənarında xeyli turist var. Kimi xizək sürür, kimi şəkil çəkdirir, kimi də sadəcə əylənərək, Göygölün gözəlliyinə tamaşa edir.
…Gəncədən Göygölədək məsafəni əvvəllər bir neçə saata qət edirdik. Çünki yol narahat idi, addımbaşı qarşıya çala-çuxur çıxırdı. Digər tərəfdən lazımi materiallarla təmizləmək əvəzinə yolun bir-iki yerinə adi torpaq tökürdülər, vəssalam. İndi tamam başqa bir mənzərənin şahidi olduq, Gəncə-Göygöl yolunu cəmi 1 saata qət etdik və sevindik ki, nə yaxşı bizim də qarlı-şaxtalı günlərimiz olur. Nə yaxşı ki, Gəncəmiz, Göygölümüz var və qar onlara daha çox yaraşır!
Hamlet QASIMOV,
XQ-nin bölgə müxbiri
