Son illər Azərbaycanda bir-birindən gözəl xeyli yol, körpü, yol qovşağı salınıb. Bu, əlbəttə, gözəllikdir, rahatlıqdır. Bəs yol kənarları necə, sürüçü və sərnişinləri, turistləri razı salırmı? Təəssüf ki, bu sahədə problemlər var və nədənsə, onların həlli yolları müvafiq qurumları bir o qədər də narahat etmir.
Bizi maraqlandıran yol boyu istirahət yerlərinin olmamasıdır. Daha doğrusu, istirahət yerləri var, amma hələ də istifadəyə verilməyib. Belə bir vəziyyət isə sürücülərin dincini almadan mənzil başına birbaşa getməsi ilə nəticələnir, qəza riskini artırır.
Xatırladaq ki, ''Yol Hərəkətinin Təhlükəsizliyinə dair 2019–2023-cü illər üçün Dövlət Proqramı''nda avtomagistralların kənarında pit-stoplar (texniki dayanacaqlar) tikilməsi nəzərdə tutulub. Təqribən üç il əvvəl belə layihələrin icrasına başlanıb. Pit-stopların sayının isə ümumilikdə 50 ədəd olması və bu məkanlarda istirahət, qidalanma və turistik məlumatlandırma yerləri nəzərdə tutulub.
Hələ bir neçə il əvvəl tez-tez getdiyim Bakı–Ələt–Gəncə magistral yolunda da bu tip istirahət məkanlarının salındığını görüb sevinmişdim. Lakin hər dəfə həmin obyektlərin hazır olmasına baxmayaraq, yiyəsiz, nəzarətsiz olduğunu görüb həm təəssüflənmiş, həm də təəccüblənmişdim. Necə yəni, dövlətin milyonlarla manat vəsaiti xərclənsin, qapılarından qıfıl asılsın və hamının gözü qarşısında dağılıb getsin?!
Bu dəfə Gəncəyə gedərkən düşüb yol kənarlarındakı yiyəsiz obyektlərə baxdım. Hamısının ətrafını kol-kos basıb, keşikçi sığınacaqları olsa da, orada heç kim yoxdur, tam nəzarətsizdir. Sanitar qovşaqları bağlıdır, avtomobillərin burada dayanması üçün yer ayrılıb, amma qarşısına məftil sədlər çəkilib. Yeri gəlmişkən, bu cür ayrılmış yerlərdən istifadə edə bilməyən sürücülər nəqliyyat vasitələrini düz magistralın kənarında saxlayırlar ki, bu da olduqca təhlükəlidir.
Maraqlıdır, bəs, bütün bunlara kim cavabdehdir, istifadəyə verilməmiş dağılıb gedən vacib obyektlərə görə kim məsuliyyət daşıyır? Nə qədər qəribə olsa da, gözəgörünməz şirkəti tapmaq müşkülə çevrilib. Azərbaycan Avtomobil Yolları Dövlət Agentliyi bildirir ki, bu “dayan-dincəl”lərin bizə heç bir aidiyyəti yoxdur, onları hansısa özəl şirkət tikir. Əslində, bu da qənaətləndirici cavab deyil. Yol salasan və bilməyəsən ki, yol kənarında obyektləri salan kimdir...
Öyrəndiyimə görə, Azərbaycanda Latviyanın özəl memarlıq şirkəti tərəfindən hazırlanan layihə dövlət inkişaf infrastrukturu sahəsində bir ilkdir. Layihənin məqsədi şəhərlərarası hərəkət keyfiyyətinin artırılması, eyni zamanda qonşu ölkələrdən turistlərin cəlb edilməsidir. Amma nə olsun, 2021-ci ildə təhvil verilməsi gözlənilsə də, tikilib hazır vəziyyətə gətirilən bu məntəqələr hələ də istifadəyə verilməyib. Baxımsızlıq isə milyonlar xərclənən komplekslərin bərbad hala düşməsinə gətirib çıxarır.
Məlum olduğu kimi, Azərbaycan Prezidenti Respublikada 2024-cü ilin “Yaşıl dünya naminə həmrəylik ili” elan edilməsi haqqında sərəncam imzalayıb. Gələn il COP29 kimi mötəbər bir tədbirin Azərbaycanda keçirilməsi isə mühüm tarixi hadisədir. İndidən bu böyük tədbirə ciddi hazırlıqlar başlanıb. Ümid edirik ki, yuxarıda haqqında söhbət açdığımız vacib məsələ ilə bağlı müvafiq qurumlar təcili tədbirlər görəcək, yol kənarlarındakı istirahət məkanları nəinki tezliklə istifadəyə veriləcək, həm də yaşıllığa qərq olunacaq.
Hamlet QASIMOV,
XQ-nin bölgə müxbiri
(Fotolar müəllifindir)