Respublika Perinatal Mərkəzində Tibbi Ərazi Bölmələrini İdarəetmə Birliyi “2023-cü ilin yekunlarına və qarşıda duran məsələlərə dair” müşavirə keçirib. TƏBİB-in icraçı direktoru Vüqar Qurbanov görülən işlər barədə məlumat verdikdən sonra deyib: 

– Növbəti ildə qarşımızda duran vəzifələ­rin öhdəsindən gəlmək üçün ilk növbədə, xəstəxana idarəetməsinə, əlçatan, keyfiyyətli tibbi xidmətlərin təşkilinə, pasiyent məm­nunluğuna və təhlükəsizliyinə diqqət artı­rılmalıdır. Vətəndaş qəbuluna, xəstəxanada növbəliliyin tənzimlənməsinə, şəhid ailələri, qazilər və veteranlara həssaslıqla yanaşıl­malıdır. Qarşıya çıxan problemlər və onların həlli yollarının müzakirəsi bizə növbəti ildə yeni hədəflərə çatmağımıza kömək edəcək. 

Çıxışlarda ötən 11 ayda tibb müəssisələ­rinin infrastrukturunun yaxşılaşdırılması, fəaliyyətinin təkmilləşdirilməsi, tibbi xid­mətlərin inkişafı istiqamətlərində TƏBİB-də ardıcıl işlər görüldüyü bildirilib. Qeyd edilib ki, ilkin səhiyyə xidmətinin təşkili istiqamə­tində yeni tibb məntəqələri istifadəyə verilib, xidmətin restrukturizasiyası ilə bağlı zəruri tədbirlər görülüb. Yeni xidmət növləri yara­dılıb, əlavə şöbələr fəaliyyətə başlayıb. 2024-cü ildə bu istiqamətdə daha sistemli çalışa­cağıq.

Bildirilib ki, maliyyə resurslarının önəm­li hissəsi dərman və tibbi sərfiyyata ayrılır. Beynəlxalq təşkilatlar və xarici ölkələrlə aparılan əməkdaşlıq çərçivəsində də cari ildə tibb müəssisələrinə tibbi avadanlıqlar və vasitələr ianə edilib. Məqsəd bu vasitələri vətəndaşlar üçün daha da əlçatan etməkdir. Tibb müəssisələrində aparılan monitorinqlər nəticəsində aşkarlanan problemlər vaxtında aradan qaldırılır. 

Sonra müəssisə rəhbərləri cari il ərzində görülən işlərlə bağlı məruzə ediblər. Bakı üzrə poliklinikalarda mövcud vəziyyət, yeni­liklər, təcili və təxirəsalınmaz tibbi yardımla bağlı yenidənqurma işləri, Yeni Klinikada tibbi xidmətin keyfiyyətinin yaxşılaşdırılma­sı, Abşeron Rayon Mərkəzi Xəstəxanasında ümumi vəziyyət, Kliniki Tibbi Mərkəzdə gö­rülən işlər və növbəti ildə xidmətin təşkili ilə bağlı hədəflər barədə məruzələr dinlənilib. 

Gəncə Şəhər Birləşmiş Xəstəxanasının və Tibbi Reabilitasiya Mərkəzinin, Şirvan Şəhər Mərkəzi Xəstəxanasının rəhbərləri xidmətin daha keyfiyyətli və əlçatan olması üçün lazımi hədəflərdən bəhs ediblər.

Sonda bildirilib ki, icbari tibb sığorta­nın xidmətlər zərfi çərçivəsində 98 faizdən çox xidmət ödənişsiz təmin edilir. 2024-cü il ərzində TƏBİB-in strateji planına əsasən, islahatlar davam etdiriləcək, infrastruktur yenilənəcək, kadr potensialı, maddi-texniki baza daha da güclənəcək. Müəssisə rəhbər­ləri çatışmazlıqların aradan qaldırılmasına 2024-cü ildə prioritet istiqamət kimi çalışma­lıdırlar.

Zərifə HÜSEYNOVA
XQ