Oğlumun erməni əsirliyindən azad ediləcəyi xəbərini eşidəndə sevincimdən elə qışqırdım ki, qonşular səsimə gəldilər. Elə bilmişdilər ki, oğlumdan bəd xəbər almışıq. Çünki bir gün əvvəl Hüseynin ömürlük həbs cəzasına məhkum olunması xəbərini eşitmişdik. Həqiqətən həmin gün ölümdən qayıtdım...

Bu sözləri AZƏRTAC-ın əməkdaşına müsahibəsində Ermənistanda hərbi əsirlikdə olan Hüseyn Axundovun anası Şəlalə Axundova söyləyib.

Oğlunun erməni əsirliyindən azad ediləcəyi xəbərini qızından eşidən Şəlalə Axundova təəssüratlarını bölüşərək deyib: “Qızım gəldi, qapıdan girəndə dedi, ay ana, belə xəbər yayılıb. Mən sevincimdən qışqırdım, neyniyəcəyimi bilmədim. Ümumiyyətlə, səkkiz ayda ilk dəfə belə hisslər keçirdim. Oğlumun ömürlük həbs xəbərini alandan sonra bu xəbər mənə qeyri-adi gəldi. Cənab Prezidentimiz mənə, biz valideynlərə elə gözəl hiss yaşatdı ki... Oğlumun erməni əsirliyindən qurtarılması bizim üçün sürpriz oldu”.

Şəlalə Axundova bildirib ki, o, ötən aylarda Hüseyninin qayıdacağına ümidini bir an belə itirməyib. “Arxayın idim ki, cənab Prezidentimiz heç vaxt nə mənim övladımı, nə də Aqşini (əsirlikdə olan digər hərbçimiz – red.) erməni əsirliyində buraxmaz. Bizim oğullarımızı qaytaracaq. Aqşinin anası ilə daim danışırdıq. Bir-birimizə təsəlli veridik. Sağ olsun Prezidentimiz, bizi bu iztirabdan qurtardı”.

Daha sonra Hüseynin böyük bacısı Mətanətlə söhbət edirik. Qardaşının əsirlikdən azad olunacağı xəbərini eşidəndə sevincdən göz yaşlarını saxlaya bilmədiyini söyləyən Mətanət deyib: “Qardaşım məktəb illərindən sonra fəhləlik edərək, ailəmizi saxlayıb. Sonra əsgərliyə yollandı. Əsir düşməmişdən qabaq tez-tez danışırdıq, hər şey normal idi. Sonra əsir düşdüyünü öyrəndik. Allah o günləri bir də yaşatmasın, nələr çəkmədik...”.

Qardaşı əsir düşəndən sonra Qırmızı Xaç Komitəsinin nümayəndələri vasitəsilə danışdıqlarını bildirən Mətanət qeyd edib ki, Hüseynin geri qaytarılacağına hər zaman inanıb: “Dünən xəstəxanada idim, yoldaşım əməliyyat olmuşdu. Kefimiz də yox idi. Yaxın rəfiqəm zəng elədi ki, belə bir xəbər eşitmişəm. İnanmadım. Axşam saat 9-10 arası olardı. Sonra teleqramda, mətbuatda oxudum. Sevincimdən tez taksiyə minib evə gəldim. Anam sevindiyindən bir yerdə dayana bilmirdi, güclə sakitləşdirdik. Sağ olsun Prezidentimiz, bizə bu sevinci yaşatdı. Həm ağlayırıq, həm sevinirik, qarışıq hisslərdir. Sevincimizin həddi-hüdudu yoxdur”.

Qeyd edək ki, Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində humanizm prinsipinə sadiqlik ruhunda, xoş niyyət göstəricisi olaraq iki ölkə arasında qarşılıqlı etimad tədbiri kimi Azərbaycan tərəfindən erməniəsilli 32 şəxsin, Ermənistan tərəfindən isə 2 Azərbaycan hərbçisinin azad edilməsi barədə razılıq əldə edilib.