Dünən Medianın İnkişafı Agentliyinin təşkilatçılığı ilə “Yeni media mühitində təhsil və məşğulluq imkanları” – “MEDİAlab” layihəsinin hesabat konfransı keçirilib.
Açılış mərasimində Medianın İnkişafı Agentliyinin icraçı direktoru Əhməd İsmayılov dünyada rəqəmsal texnologiyaya sürətli keçid şəraitində media məkanında da yeni bilik və bacarıqlara yiyələnən kadrların hazırlanmasının zəruriliyini söyləyib. O qeyd edib ki, bu məqsədlə gerçəkləşdirilən MEDİAlab layihənin əsas məqsədi təhsil prosesində ənənəvi medianın rəqəmsal mediaya inteqrasiyasının dəstəklənməsi, bu sahədə kadr potensialının artırılması, media subyektləri və ali təhsil müəssisələri arasında qarşılıqlı fəaliyyət və əməkdaşlığın genişləndirilməsidir. Bu layihəyə tərəfdaş universitetlərin 1000-ə yaxın tələbəsi cəlb edilib. Bu gün imzalanan Çoxtərəfli Əməkdaşlıq Memorandumu isə başlanmış prosesin dəstəklənməsi və ümumi yanaşmanın uyğunluq göstəricisidir.
Azərbaycan Respublikası Dövlət Məşğulluq Agentliyinin İdarə Heyətinin sədri Mustafa Abbasbəyli bildirib ki, bu gün media ölkənin inkişafında, cəmiyyətlə dövlətin ortaq fəaliyyətində çox ciddi təsisata çevrilib. Texnologiyanın, sosial kommunikasiyanın inkişafı isə bu prosesdə medianı yeni müstəviyə çıxarıb. Belə bir şəraitdə media sahəsində yeni çağırışları cavablandırmağı bacaran kadrların hazırlanması və məşğulluğunun təmin edilməsi fərqli tələblər irəli sürüb. “MEDİAlab” layihəsi məhz bu hədəfə yönəlmiş uğurlu başlanğıcdır.
Medianın İnkişafı Agentliyinin şöbə müdiri Ləman İsgəndərova layihə haqqında ətraflı məlumat verərək, onun gənclərin yaradıcı düşüncəsini inkişaf etdirmək, müasir media çağırışlarına uyğun yeni ideyalar formalaşdırmaq üçün əlverişli mühit yaratmağa xidmət etdiyini söyləyib.
Sonra “MEDİAlab” layihəsi çərçivəsində keçirilən tədbirləri əks etdirən videoçarx nümayiş etdirilib. Medianın İnkişafı Agentliyi və “AzerGold” Qapalı Səhmdar Cəmiyyətinin birgə təşkilatçılığı ilə “Kreativ Media – Bakı” mövzusunda keçirilən müsabiqəsinin nəticələri açıqlanıb, qalib seçilən 20-yə yaxın gəncə mükafatlar verilib.
Sonda layihənin tərəfdaşları olan ali təhsil müəssisələrinin əlaqələndirici şəxslərinə fəal iştiraklarına görə təşəkkürnamələr təqdim olunub.
T.RÜSTƏMLİ
XQ
