Milli Oftalmologiya Mərkəzində gənc oftalmoloqların akademik Zərifə Əliyevanın anadan olmasının 100 illiyinə həsr olunmuş XV Konfransı və I Forumu keçirilib. Azərbaycan Oftalmoloqlar Cəmiyyəti (AOC) Gənc Oftalmoloqlar Komitəsinin təşkil etdiyi tədbir 2 gün davam edib.
Konfransın açılışında çıxış edən komitənin koordinatoru Emin Əlihüseynli bildirib ki, ölkəmizdə Gənc Oftalmoloqlar Konfransı 2006-cı ildən hər il təşkil edilir. İllər öncə həmin elmi məclislərdə məruzələrlə çıxış edən gənclər bu gün püxtələşmiş mütəxəssislər kimi fəaliyyət göstərir, beynəlxalq tədbirlərdə Azərbaycan oftalmologiyasını layiqincə təmsil edirlər.
Gənc Oftalmoloqlar Komitəsinin sədri, tibb üzrə fəlsəfə doktoru Mirana Mirişova qeyd edib ki, “Gənc oftalmoloqların dostu” fəxri adı ildə bir dəfə ölkəmizdə gənc oftalmoloqların inkişafına xüsusi diqqət və dəstək göstərən şəxsə təqdim edilir. Bu dəfə həmin fəxri ada AOC-nin sədri, professor Elmar Qasımov layiq görülüb. Tibb üzrə fəlsəfə doktoru Yazgül Abdıyeva bu qərara münasibət bildirərək deyib ki, AOC-ın sədri, akademik Z.Əliyeva adına Milli Oftalmologiya Mərkəzinin direktoru, professor Elmar Qasımov gənc oftalmoloqların peşəkar inkişafına daim dəstək verir, onların dünya standartlarına cavab verə bilən mütəxəssislər kimi formalaşması üçün şəraitin yaradılmasını daim diqqət mərkəzində saxlayır. Gənc Oftalmoloqlarının I Forumu da AOC-nin sədrinin dəstəyi ilə təşkil edilib.
Sonra fəxri mükafat professor Elmar Qasımova təqdim edilib.
Gənc mütəxəssislər buynuz qişa, katarakta və refraksion cərrahiyyə, okuloplastika, okulyar travmatologiya, okulyar onkologiya, neyrooftalmologiya, tibbi və cərrahi retina, pediatrik oftalmologiya və çəpgözlük, optika və refraksiya, okulyar infeksiyalar, həmçinin uveitlər mövzusunda özündə elmi yenilikləri ehtiva edən mövzularda məruzələr ediblər. Tədbirdə bu sahəni yeni öyrənən həkim-rezidentlər – Nuranə Ələkbərova, Cəmilə Qasımova, Gülxanım Şahmuradova, Samir Manafov, Səbinə Quliyeva, Pakizə Mehralıyeva, Ayan Qəlbinur, Şəhla Musalı, Xatirə Veysəllinin çıxışları da dinlənilib.
Türkiyə, Rusiya, İtaliya, San Marino, Hindistan və Honq-Konq mütəxəssisləri məclisə onlayn qoşulublar.
Konfransın ardınca keçirilən Azərbaycan Gənc Oftalmoloqlarının I Forumunda bildirilib ki, ilk dəfə belə formatda təşkil edilən mərasimin məqsədi gənc mütəxəssislərin qarşılaşdığı problemləri birlikdə dinləmək, praktik oftalmologiyada kövrək addımlarını atan gənc oftalmoloqlarla təcrübəli alim və həkimlərin fikir mübadiləsinə şərait yaradılmasıdır.
“Gənc oftalmoloqların professional inkişafında perspektivlər, beynəlxalq resurslar, problemlər və onların həll yollarının axtarışı” mövzusunda 3 saat davam edən forumda gənc oftalmoloqların diqqətini cəlb edən müxtəlif mövzuların müzakirəsi doktor Emin Əlihüseynlinin moderatorluğu ilə həyata keçirilib. Bundan başqa, həkimlər İnarə Hacı, Pərvin Ağayeva, Lalə Məmmədova, Xuraman Ramazanova və Emin Ərəbov müxtəlif mövzularda məruzələr ediblər.
Z.HÜSEYNOVA
XQ
.jpg)
