Diasporla İş üzrə Dövlət Komitəsinin sədri Fuad Muradov Bişkek şəhərinə səfəri çərçivəsində Qırğızıstan Xalq Assambleyasının sədri Almambet Matubraimovla görüşüb.
A.Matubraimov hazırda Qırğızıstan ərazisində 100-dən artıq milli azlığın nümayəndələrinin yaşadığını diqqətə çatdırıb. Qeyd edib ki, bütün milli azlıqların hüquq və azadlıqlarının təmin olunması istiqamətində çalışan assambleyada 30 təşkilat rəsmi olaraq təmsil olunur. O, azərbaycanlıların mütəşəkkil qüvvəyə çevrildiyini vurğulayıb.
Qırğızıstanda Heydər Əliyev adına 20 nömrəli Məktəb-Gimnaziya təhsil-tərbiyə kompleksini, Nizami Gəncəvi adına 103 nömrəli Qırğızıstan–Azərbaycan orta məktəbini və “İrs” İctimai Birliyinin nəzdindəki “Bazar günü məktəbi”ni ziyarət etdiyini bildirən F.Muradov həmin məktəblərdə Azərbaycan dilinin tədris olunmasından məmnunluğunu ifadə edib. Dövlət komitəsinin sədri qırğız cəmiyyətinə sıx inteqrasiya edən azərbaycanlıların dövlət qayğısı ilə əhatə olunduğunu yüksək qiymətləndirib.
Sonda Azərbaycanın Diasporla İş üzrə Dövlət Komitəsi ilə Qırğızıstan Xalq Assambleyası arasında Anlaşma Memorandumu imzalanıb.
XQ