Ölkəmizdə həyata keçirilən daşınmaz əmlak və torpaq islahatlarının əsas tərkib hissəsi kimi, mülkiyyət hüquqlarının tanınması, toxunulmazlığı və qorunması da prioritet məsələlərdən biridir. Respublikamızın qanunvericilik aktlarında, tərəfdar çıxdığı beynəlxalq müqavilələrdə öz əksini tapan vətəndaşların bu sahədəki qanuni mənafelərinin müdafiəsi, hüquqları barədə maariflənidrmə olduqca vacibdir. Günümüzdə aktuallıq kəsb edən bu məsələ ilə bağlı Naxçıvan Şəhər İcra Hakimiyyətinin hüquq şöbəsinin müdiri İsa Allahverdiyevlə həmsöhbət olduq.
– İsa müəllim, istərdik ki, söhbətimizin əvvəlində daşınmaz əmlaka münasibətdə vətəndaşların mülkiyyət hüquqlarının tanınması və toxunulmazlığı barədə məlumat verəsiniz.
– Daşınmaz əmlaka münasibətdə mülkiyyət hüququnun əldə edilməsi, itirilməsi və pozulması halları Azərbaycan Respublikasının Konstitusiyasında, digər normativ hüquqi aktlarda, eləcə də ölkəmizin tərəfdar çıxdığı beynəlxalq müqavilələrdə öz əksini tapıb. Mülkiyyət hüququ mülkiyyətçinin təkbaşına və ya başqaları ilə birlikdə əmlaka sahib olmaq, əmlakdan istifadə etmək və onun barəsində sərəncam vermək hüquqlarından ibarətdir.
Konstitusiyamızın 13-cü maddəsində göstərildiyi kimi, Azərbaycan Respublikasında mülkiyyət toxunulmazdır və dövlət tərəfindən müdafiə olunur. Mülkiyyətin 3 növü (dövlət mülkiyyəti, xüsusi mülkiyyət və bələdiyyə mülkiyyəti) mövcuddur. Eyni zamanda, Konstitusiyanın 29-cu maddəsinin tələblərinə əsasən, heç kəs məhkəmənin qərarı olmadan mülkiyyətindən məhrum edilə bilməz və dövlət ehtiyacları üçün mülkiyyətin özgəninkiləşdirilməsinə yalnız qabaqcadan onun dəyərini ədalətli ödəmək şərti ilə yol verilə bilər.
– Vətəndaşlar mülkiyyətlərinin dövlət qeydiyyatına alınması üçün nə etməlidirlər?
– Mülki Məcəllənin 139-cu maddəsinə əsasən, mülkiyyət hüququ və daşınmaz əmlaka digər hüquqlar, bu hüquqların məhdudlaşdırılması, yaranması, başqasına keçməsi və xitamı dövlət qeydiyyatına alınmalıdır. Daşınmaz əmlaka hüquqların dövlət qeydiyyatı müvafiq icra hakimiyyəti orqanı tərəfindən (Naxçıvanda Muxtar Respublikanın Daşınmaz Əmlak və Torpaq Məsələləri üzrə Dövlət Xidməti) qanunvericiliklə müəyyənləşdirilən qaydada tərtib edilən daşınmaz əmlakın dövlət reyestrində həyata keçirilir. Qeyd olunan hüquqların dövlət qeydiyyatı üçün vətəndaşlar tələb olunan sənədlərlə birgə həmin orqana müraciət yolu ilə təyin edilən rüsumlarını ödəməklə mülkiyyət hüquqlarını təsdiqləyən sənədləri əldə edə bilərlər.
– Bəs yerli icra hakimiyyətlərinin vətəndaşların mülkiyyət hüquqlarını təmin etməsi və bununla bağlı müraciətləri qeydə alması hansı formada tənzimlənir?
– Yerli icra hakimiyyəti orqanları Azərbaycan Respublikası Prezidentinin 2012-ci il 6 iyun tarixli Fərmanı ilə təsdiqlənən “Yerli icra hakimiyyətləri haqqında” Əsasnamənin və digər normativ-hüquqi aktların tələbləri əsasında mülkiyyətin qorunmasını, mülkiyyət hüququnun pozulmasının qarşısının alınmasını, həmçinin vətəndaşların mülkiyyət hüquqlarını təsdiqləyən sənədləri əldə etmək üçün əsas verən inzibati aktların (müvafiq sərəncamlar, əmrlər və s.) qəbul olunmasını gerçəkləşdirir və dövlət mülkiyyətində olan torpaq ehtiyatlarından səmərəli istifadə məqsədilə müvafiq tədbirlər görürlər. Vətəndaş müraciətlərinin təmin edilməsi isə “Vətəndaşların müraciətləri haqqında” Azərbaycan Respublikasının qanununa uyğun formada həyata keçirilir.
– Vətəndaşların mülkiyyət hüquqlarının pozulmasının qarşısının alınması ilə bağlı fəaliyyətiniz necə gerçəkləşir?
– Naxçıvan Şəhər İcra Hakimiyyətində son dövrlərdə müxtəlif hüquq pozuntuları ilə bağlı vətəndaş müraciətləri artıb. Qeyd olunan müraciətlərin əksəriyyəti mülkiyyət hüquqları pozulmuş vətəndaşlarla bağlıdır və onların bir çoxunun işi aidiyyəti üzrə məhkəmə qaydasında həllini tapır. Mülkiyyət hüququ pozulmuş vətəndaşlar əvvəlcə tələb olunan sənədlər əsasında icra hakimiyyətində qeydiyyata alınır və daha sonra məhkəməyə müraciət etmələri ilə bağlı onlara ətraflı məlumat verilir.
Təəssüf ki, hazırda mülkiyyət hüquqlarının pozulması ilə bağlı şəhər icra hakimiyyətinə qarşı iddia tələbi irəli sürmüş vətəndaşların daşınmaz əmlak obyektləri, təximnən, 2003–2015-ci illərdə qeyri-qanuni formada, məhkəmə qərarı olmadan sökülmüş və onlara qarşılığında hər hansısa kompensasiya ödənilməmişdir.
Sevindirici haldır ki, qeyd olunan məsələ ilə bağlı vətəndaşların pozulmuş hüquqlarının bərpası və onlara dəymiş ziyanın qarşılanması üçün Naxçıvan Şəhər İcra Hakimiyyəti tərəfindən 17 avqust 2023-cü il tarixli sərəncama əsasən, qurumun öz vəsaiti hesabına şəhərin müvafiq ərazilərindən həmin vətəndaşlara yaşayış və qeyri-yaşayış sahələri üçün torpaqlar ayrılıb. Əlavə olaraq qeyd etmək istərdim ki, son 3 ay ərzində Naxçıvan Şəhər İcra Hakimiyyətinə mülkiyyət hüququ pozulmuş vətəndaşlar tərəfindən 470 ərizə daxil olub, onlardan 255-i aidiyyəti üzrə Naxçıvan Muxtar Respublikası İnzibati Məhkəməsinə göndərilib. Həmin vətəndaşdan 156 nəfəri Naxçıvan Şəhər İcra Hakimiyyətinin təklif etdiyi torpaq sahəsi ilə razılaşıb və onlardan 133 nəfərin hüquqları dövlət qeydiyyatına alınması üçün muxtar respublikanın Daşınmaz Əmlak və Torpaq Məsələləri üzrə Dövlət Xidmətinin Naxçıvan Şəhər İdarəsinə göndərilib.
Daxil olan məhkəmə işlərinin 81-nə müvafiq məhkəmə tərəfindən rəsmi qaydada xitam verilib. Bu, o deməkdir ki, mülkiyyət hüquqları pozulan vətəndaşlar tərəfindən daxil olan müarciətlərin, təxminən, 75 faizi öz həllini tapıb və digər məhkəmə prosesi davam edən vətəndaşlarla isə məsələlərin müsbət həlli üçün danışıqlar aparılır. Bununla paralel olaraq, vətəndaşların pozulan hüquqlarının bərpasına dair hüquqi maarifçilik işlərinin artırılması, eyni zamanda, onlara dolğun, düzgün və qanunvericiliyin tələblərinə uyğun məlumatların verilməsi ilə əlaqədar icra hakimiyyəti tərəfindən müvafiq tədbirlər həyata keçirilir.
Söhbəti apardılar:
Mirbağır YAQUBZADƏ,
Səbuhi HƏSƏNOV
XQ
Bakı–Naxçıvan–Bakı