Dünən “Facebook”da filologiya elmləri namizədi, tanınmış dilçi Aynur Familqızı ana dilimizlə bağlı dəyərli fikirlər paylaşıb. Diqqətlə oxusanız, şərhə ehtiyac qalmayacaq.
Orada yazılır: “Ana dilində düşünmək, danışmaq, təbliğ etmək milli ideologiya məsələsidir. Millətin, dövlətin təhlükəsizliyinin önəmli strateji hədəfi milli dil məsələsidir. Bunu niyə anlamırıq?!
Ən böyük səhvimiz Ana dilini digər xarici dillərlə müqayisə etməkdir və dünyaya çıxış üçün xarici dilə üstünlük verməkdir. Niyə özümüzə - dilimizə dəyər vermirik, bəyənmirik?
Bu torpağın suyunu içirik, çörəyini yeyirik… Sabah dilini “sevə-sevə öyrəndiyiniz” imperiyalar çökəndə yenə üz tutacağınız, qoynuna sığınacağınız doğma Ana dilimiz olacaq. Tarix bunu orta əsrlərdən bəri bizə görk edibdir: ərəb dili, fars dili, rus dili…
Atam balası, dilə sevgi deməklə, danışmaqla olmur, bulaq kimi içəridən qaynamalıdır! “Nə qədər ki, tədbirlərdə ana dilimizdə “ürəkdolusu” danışıb, hətta gözdən pərdə asaraq “mübahisələr” edirik, evə çatanda dediklərimizi unuduruq dilimizi bəyənməyib dost-tanış, ailə içində başqa dillərə üstünlük veririk, onda “vay” bizim halımıza. Ömrümüzün ahıl çağında mənəvi borcumuzu qaytara bilməyəcəyimiz üçün ölüb dirilirik, “köçəri quş” kimi uçmağı düşünürük, qonmağa “budaq” axtarırıq… Nə isə…
Nə yaxşı ki, şair demiş:
Ana dilim ölən deyil,
Başqa dilə çönən deyil.
Təqdim etdi: M.HACIXANLI, XQ