5 Sentyabr Beynəlxalq Xeyriyyəçilik Günüdür. Bu günün qeyd edilməsi ilə bağlı BMT Baş Assambleyası qərar verib.
Xeyirxah əməlləri ilə insanların qəlbində əbədi yer tutmuş şəxsiyyətlər heç vaxt unudulmur. Belə insanlardan biri – bütün dünyada Tereza Ana adı ilə tanınan albaniyalı məşhur xeyriyyəçi qadının əsl adı isə Aqnes Qonça Boyaçıdır. O, 1910-cu ildə avqustun 26-da hazırda Kosovonun ərazisində yerləşən Uskub şəhərində anadan olub, 5 sentyabr 1997-ci ildə Hindistanın Kəlküttə şəhərində dünyasını dəyişib.
Tereza Ana insanlara tövsiyəsində demişdir: “Yoxsulları sevməyin verdiyi sevinci həmişə hiss edin. Unutmayın, sevgi ilə dolu olmaq, sülhlə dolu olmaq deməkdir. Tanrı hər birinizi qorusun”.
Həyatının mənasını insanlara daim yaxşılıq etməkdə tapan Tereza Ana yardımsevərliyinə görə 1979-cu ildə Nobel sülh mükafatına layiq görülüb. Sentyabrın 5-nin Beynəlxalq Xeyriyyəçilik Günü kimi qeyd edilməsi məhz onun vəfat etdiyi günlə əlaqədardır.
Zülfiyyə ZİYA, XQ