Azad olunmuş ərazilərdə məşğulluq
Böyük Qayıdış proqramına uyğun olaraq işğaldan azad olunmuş ərazilərə köçürülən sakinlərin aktiv məşğulluğu istiqamətində işlər davam etdirilir.
Əmək və Əhalinin Sosial Müdafiəsi Nazirliyinin ictimaiyyətlə əlaqələr və kommunikasiya şöbəsindən bununla bağlı bildiriblər ki, Dövlət Məşğulluq Agentliyi həmin sakinlərin məşğulluq imkanlarının qiymətləndirilməsi məqsədilə həftə ərzində Laçın rayonu və Ağalı kəndinə köçürüləcək daha 45 ailə ilə görüş keçirib.
Qeyd edilib ki, görülən işlərin davamı olaraq artıq Laçına köçürülmüş sakinlərlə də görüşlər davam etdirilib. Agentliyin nümayəndələri Laçına köçürülmüş daha 14 ailə ilə söhbət aparıb. Görüşlər zamanı həmin ailələrin üzvləri ilə məşğulluq imkanlarının müəyyənləşdirilməsi istiqamətində ilkin söhbətlər aparılıb. Onların hansı məşğulluq proqramına cəlb olunacaqları müəyyənləşdirilib.
Doğma yurdlarına köçürülən sakinlərin münasib vakansiyalar üzrə işlə təminatı, özünüməşğulluq proqramına cəlb olunmaları, eləcə də sakinlərdən bir qisminin yeni peşələrə yiyələnmələri məqsədilə peşə hazırlığı kurslarının təşkili üzrə tədbirlər davam etdirilir.
Zaqatalada fərdi təsərrüfatlara baxış
Əmək və əhalinin sosial müdafiəsi naziri Sahil Babayev və Zaqatala Rayon İcra Hakimiyyətinin başçısı Mübariz Əhmədzadə özünüməşğulluq proqramı çərçivəsində rayon sakinləri Qocayeva Gülşən Rəcəb qızı və Məmmədov Abdulla İsa oğlunun kiçik təsərrüfatlarına baxış keçiriblər.
Bildirilib ki, bir müddət əvvəl Gülşən Qocayeva və Abdulla Məmmədov Dövlət Məşğulluq Agentliyinə şəxsi bizneslərini qurmaq arzusunda olduqlarını bildiriblər. Agentliyin nümayəndələri ilə görüşlər zamanı onların hansı məşğulluq proqramına cəlb olunacaqları müəyyənləşdirilib. Bundan sonra Gülşən Qocayeva “kiçik dərzi sexi”, Abdulla Məmmədov isə “kiçik dəmirçi sexi” biznes ideyaları üzrə özünüməşğulluq proqramı çərçivəsində aktivlərlə təmin ediliblər.
Nazirlə görüş zamanı hər iki proqram iştirakçısı qayğı ilə əhatə olunduqlarına, kiçik biznes sahələrini yaratmaları üçün göstərilən dəstəyə görə dövlət başçısına minnətdarlıqlarını bildiriblər.
Prezident İlham Əliyevin tapşırıqlarına uyğun olaraq məşğulluq proqramlarının genişləndirilməsi istiqamətində bu ilin ötən dövründə 171 min 600 şəxs aktiv məşğulluq tədbirləri ilə əhatə olunub, o cümlədən 6 min 800 nəfər özünüməşğulluq proqramına cəlb edilib.
6 ayda 6 mindən çox işsiz peşə öyrənib
Dövlət Məşğulluq Agentliyi yanvar–iyun aylarında 6 min 113 şəxsi əmək bazarının tələblərinə uyğun peşələr üzrə peşə hazırlığı kurslarına cəlb edib.
Onlardan 3 min 518 nəfəri üçün Agentliyin Bakı, Gəncə, Göyçay və Naxçıvan peşə hazırlığı mərkəzlərində, 2 min 595 nəfəri üçün isə özəl tədris müəssisələrində peşə kursları təşkil olunub.
Verilən məlumata görə, kurslarda iştirakçılara müxtəlif peşələr üzrə nəzəri və praktiki biliklər tədris olunub.
Agentlikdən, bildiriblər ki, hazırlıq kurslarını uğurla bitirən müdavimlərdən 2 min 311 nəfəri müvafiq sahələr üzrə işlə təmin olunub.
Z.BAYRAM, “Xalq qəzeti”